Vawiin khan Pu Lalrobiaka Dampa bialtu MLA, ZIDCO Chairman ni bawk chuan a bial chhung khaw pali Saithah, Phuldungsei, West Phulpui leh Marpara te a thlawh a. Public meeting leh khawtlang hruaitute nen inkawmhona hun an hmang.

Bialtu MLA chuan a bial chhung chu hriselna kawnga kan hnufual avangin kan District atanga awlsam zawka Falkawn Referral Hospital thlawhpawh zung zung anih theih nan kawngpui sial mek a nih thu sawiin tunah hian Lungphun khua thleng kawng sial hna thawh a ni tawh a ni a ti. Saithah khuaah pawh a remchang hmasa berah Border Area Development Project (BADP) hnuaia Sub Centre sak chu hawn a ni dawn a, health worker nei thei turin bawhzui nghal anih tur thu a sawi bawk. Sorkar chuan project scheme leh flagship program hmangin mipuite hnenah tanpuina hrang hrang a pe thin a, amaherawh chu Pathian tih chunga a nihna tur ang taka hmang thin te chauhin an dinchuahpui thin a, kum 1990 chho vela NLUP hmasaah pawh thahnemngai taka a nihna tur anga sorkar tanpuina hmang thinte chuan tunah hian Aizawl khawpui leh a chhe velah eizawnna ngialnghet tak bawnghnute sem tur an nei deuh vek tawh a ni a ti. A bial chhunga NLUP beneficiaries te chu dik taka an sum dawn chu hmang a, taihmakna nen a hlawhtlinpui ngei turin a chah.

Bialtu MLA tawiawmtu Pu Jacob Lalawmpuia Addl.DC Mamit pawhin thu sawiin Mamit District chu India ram pum atanga Aspirational District 115 thlan zinga a tel ve avang hian kawng hrang hrangah hmasawnna hna kan district chhunga thawh a ni dawn a, neitu chan changa a thawktute lo tawiawm turin a chah bawk.

Bialtu MLA hnenah hian khawtlang hruaitute hian an mamawh hrang hrang lo thlenin theih ang anga a tahtawla ngaihtuah zui an nih tur thu khawtlang hruaitute hi a hrilh a ni.