Vawiin chawhma dar 11:00Am khan D.C’s Conference Room- Siaha ah Bawrhsap Pi Harleen Kaur IAS hovin kum tin September Ni 5 a lawm thin Zirtirtute Ni (Teachers’ Day) vawi 56-na hman dan tur chungchang ngaihtuahin District Teachers’ Day Organising Committee Member ten meeting an nei. 

He meeting Pi Harleen Kaur IAS kaihruai-ah hian kum dang ang bawkin mahni School theuh a an remchan dan angin Teachers’ Day chu ropui leh urhsun taka hman nise, kumin ah erawh a hman dan tlem tih danglamin Siaha Block bikah chuan DRDA Conference Hall-ah hman nise, School tin atangin aiawh panga aia tam lo theuh tel tura detail nise. Tin, School Naupang ten Hnam lam entirna te neih nih bawk se, Zirtirtu thawk thate thlanchhuah a chawimawina thu ziak hlanna te neih ni bawk se, zirtirtu thawktha thlang tur hian mahni School a Head Master tena an recoment te chu Sub-Committee hnenah thehluh nise, Sub-Committee in final Selection a neih ang tih meeting chuan a rel a ni. 2017 Teachers’ Day hmanna a sum mamawh chu Deputy Commissioner’s Office, District Education Office leh MADC in a tum ang a, Kawtthler lunlai hmun remchang deuh ah te Banner tar nise tihte rel a nih  bakah, Chief Minister, Education Minister leh Deputy Commissioner ten Teachers’ Day puala an thuchah (Message) te chu Zirna In tinah te leh I&PRO’s Office bakah Cable T.V. leh Chanchinthar thehdarh tute hnenah semchhuah vek nise tih a rel a ni. Hetiang bawk hian Tipa Block ah pawh hman ve nise, hemi chungchang hi SDO, Tipa RD Block hovin lo ngaihtuaha atul anga hma lo la tura hriattir nise tih vawiin meeting chuan a rel a ni.