Vawiin chawhma khan I&PR Auditorium-ah School Education Minister Pu H. Rohluna chuan Tuipuiral Zirlai Pawl(TZP) ten an member Aizawla lehkha zira awm tharte lawmna programme an buatsaih a hmanpui a. He hun hi East Tuipui Bialtu MLA Pu T. Sangkunga pawhin hmanpuiin, Pu C.Vanlalvena MPS(retd) chu khual zahawm a ni.

School Education Minister Pu H. Rohluna chuan mahni awm chhan ngaihtuah lova hun khawhral hian zirna lamah min pawhhniam fo thin thu sawiin TZP member kalkhawmte chu mahni awm chhan ber inzawt fova, zirna sang zawk beiseina leh hmasawn duh vang ani tih hre rengin taima taka thawk turin a fuih a. School Education Minister chuan sawrkarin zirna a ngaihpawimawh thu leh zirtirtu indaih lohna vanga harsatna sutkian anih theihnan theihtawp a chhuah thu a sawi a. Zirtirtu mamawhna zualpui phuhruk theihnan zirtirtu lak belh tura hma an lak mek thu a sawi bawk. Pu H. Rohluna chuan zirna kalphung, zirna in (school, highschool, college), leh zirtirtu service pawhin hma a sawn theihnan tangruala hmalak a tul thu a sawi a. Zirlai kalkhawmte chu ram leh hnam tana chhenfakawm ni turin bul an tan that tawh angin a tawp thlenga tang mar-in hlawhtling tlaka hnathawk turin School Education Minister chuan a chah a ni.  

East-Tuipui bialtu MLA Pu T. Sangkunga pawhin thusawiin Tuipuiral Zirlai Pawl(TZP) chuan zirlaite hmakhua ngaia  bial tan nasa taka hna an thawh thin avangin lawmawm atih thu a sawi a. Pu T. Sangkunga chuan SSA, Bank, Railway leh UPSC hnuaiah kumtinin hna sang chuang lak ziah ani a, Mizoram sawrkar pawhin kumtin hna engemawzah  la thinin  thawkrim peihte tan chuan hnathawh tur a awm tiin zirlaite a fuih a. Bialtu MLA chuan Mizo zirlaite tan awlsam zawka hna exam tura inpuahchah theihnan, India rama coaching center tha  pahnih sawrkarin Mizoramah chah chhuakin zirlaite zir man a tam zawk a tumsak thu a sawi a, heng coaching center te hmang tangkaia  rinawmna, thawhrimna leh tih tak takna nen tan laa Central Service exam-ah te Mizo thalaite tun aia nasaa hlawhtlinna hmu se a duh thu a sawi a ni.

Pu T. Sangkunga chuan East Tuipui bial hmasawnna tura hmalakna te tarlangin PMGSY hnuaia Mizorama kawng laih thar tur leh Black top tur tam tak chu East Tuipui bial chhung ami anih thu a sawi a,  sial vulhna khuaah barbed wire sem vek anih thu a sawi bawk. East Tuipui bial chhunga zirtirtu indaihlohna avanga harsatna sutkian tumin theihtawpa hmalak anih thu sawiin, hmasawnna tura tangruala thawhpui zel atan Tuipuiral Zirlai Pawl te Pu T. Sangkunga chuan a sawm bawk a ni.

Pu T. Sangkunga hian MLA Award (laptop) a  bialchhunga zirlai titha ber hnena sem thin chu  C. Thangpuii, Sazep khua, MZU-a M.Sc (Mathematics and computer science)   Gold Medalist hnenah a hlan nghal bawk a ni.

TZP Freshers Social ah hian khual zahawm Pu C. Vanlalvena MPS(retd) pawhin thusawiin TZP te chu zirlaite hmasawnna tura tha chawl lova thawktu nizel turin a chah a ni.

Tuipuiral Zirlai Pawl Freshers Social-ah hian chawimawina chi hrang hrang semin, bial tihmingthatu chawimawina Lalhunmawia, Bungzung khua Chhaktiang Lelte winner hnenah leh CS Ramsangliani Dungtlang khua National level hockey player hnenah an hlan a. Heng bakah hian UG leh PG result a TZP member topper 9 te hnenah chawimawina an hlan bawk a ni. Freshers social hi TZP Vice President K. Lalnunzama’n a kaihruai a, chawhnu lamah TZP thupui “Learn for Wisdom” hmanga thusawite ngaithla in hun an hmang a ni.

Tuipuiral Zirlai Pawl hi 1986 a din niin, tuipuiral khua 25 huam chhunga zirlaite an tel a ni.