Vawiin khan Serchhip District Level Committee for Celebration of Teacher’s Day, 2017 chu an Chairman Pi Sangchhin Chinzah, Serchhip Bawrhsap ni bawk hovin an thukhawm a. Kumin September ni 5, a Teacher’s Day lo thleng tur hman dan tur an rel. 

Chairman Pi Sangchhin Chinzah chuan, zirtirtute chu hnam dintute zinga mi, thangthar tha zawk min pe tute an nih avangin an zahawm em em a. Tha taka hna an thawh thin avangin Mizoram pawh kum reilote chhungin ziak leh chhiar thiam tamna ramah min siam a; A, AW, B kan neih ve hma kum tam taka lo nei tawh State te pawh kan lehpel thei hial a ni, a ti. Zirtirtute ni pawh zirtirtute chawimawina ni, zahna kan hlanna ni atana hman ngei zel a tha a ni, a ti bawk. 

Vawiina thukhawm hian, kum danga an lo tih thin tawh angin zirna in tinte chu anmahni remchan dan leh tha an tih angin he ni hi hmang se, tiin a rel a. Sub-Division te pawh anmahnin tha an tih anga he ni hman dan tur lo rel ve turin zalenna an pe bawk. Serchhip khaw chhungah he ni puala Banner tar nise, District Education Office lamin lo buaipui se tia a rel bakah Chief Minister leh Education Minister thuchahte chu a darhzau thei ang bera thehdarh nise tiin a rel a. Bawrhsap pawhin he ni pual hian thuchah siam se, District chhung Cable TV hrang hrangah sem darh nise tiin a rel bawk a ni. 

Vawiina meeting ah hian Serchhip SP Pu Lalringdika leh member dangte an kal tha hle ani.