Mission for Integrated Development of Horticulture (MIDH) leh NEDP hnuaia fûr zikhlum (off-season cabbage) Samthang rama Horticulture Department-in a chintir chu a thar vanglai niin nimin ni 27.7.2017 khan Mizoram hmun hrang hranga hralh turin vailiam a ni. 

Mizorama fur zikhlum thar tam ber Samthang khua chuan Horticulture Department puihnain nikum aia tam zawk thar tumin hma an la mêk a. Tunlai hi a thar vanglai niin nimin chawhnu khan Mizoram Horticulture Department Deputy Director Pu Vanlalruata Chenkual chuan Mizoram hmun hrang hranga hralh chhuah turin a vai liam a, zikhlum chin chu kuthnathawktute tan eizawnna tling, thlai dang nena chin pawlh leh chin chhunzawm rem tak a ni a ti. India scientist-te chuan fur tomato an siam chhuah tawh thu sawiin zikhlum nen pawha chin kawp theih chi niin a sawi. 

Commerce & Industries Dept. Deputy Director Pi Lalsangpuii pawhin thu sawiin Mizoram chu tlangram leh state hnufual a nih avangin loneitute thlai thar hralhchhuahna kawngah state dangte aiin a harsaa zawk a, an thlai tharte tun aia mumal zawka hralhchhuah a nih theih nan an harsatna tawhte zirchiang a, ruahmannna fel tak neih a tul thu a sawi a. Harsatna tam tak zingah thil phurh man to lutuk te, farmer society tha leh changtlung la neih tâwk loh avang te, rinawmna leh dikna kan tlakchham thin avangin thlai tharte man man zawka hralhna kawngah harsatna tawh theih a ni a ti bawk. 

Off-Season Cabbage vailiam programme hi MIDH hmanga sak Pack House-ah hman niin Khawzawl DHO Pu F. Lalthlamuana’n a kaihruai a, Samthang Farmers’ Association Secretary Pu PC Lallawmsanga’n report pein zikhlum ching tura an hmalakna leh sorkar lamin an puihbawmna a tarlang. Samthang hian nikum khan zikhlum quintal 1260 thar chhuakin, kuminah quintal 1072 an hralh chhuak tawh a; tuna an la seng kal mêk nen a vaiin quintal 2500 chuang kumin hian thar chhuah an inbeisei a. Zikhlum chinnaah hian samtawk an chin tel bawk chu nikumah quintal 588 an thar tawh a, quintal 100 vel thar belh an inbeisei bawk a ni. Tunkarah zikhlum quintal 338 thawnchhuak tawhin, nimin bikah zikhlum hralh tur vailiam hi a vaiin buara bag 280 (quintal 134 chuang)  a ni. Flag Off-ah Samthang VC, Farmers’ Association President leh Mizoram Fruits & Veg. Supplier Assn aiawhten thu an sawi bawk a ni. 

Nimin vek khan Samthang Circle Horticulture Office Complex-ah Farmers Training neih a ni a. Marketing Officer Pu Ronald Lalchhuanawma chuan zikhlum kg 1 thar chhuahna atana an senso ngai zat leh a hralhchhuahna leh an sum thawhchhuah dik tak hriat theih dan zirtirin; eizawnna tlo leh ngelnghet nei thei tur chuan thawklehkhata hlawk thut tum aiin kalphung mumal leh tha neih hmasak a pawimawh a ni a ti.