Vawiin chawhma dar 11:00 khan Government Hnahthial College chuan Freshers’ Social leh Graduation Day an hmang a, Higher & Technical Education Minister Pu R. Romawia chuan khuallian niin a hmanpui.

Pu R. Romawia chuan zirlai kalkhawmte chu tum mumal nei a, ram leh khawtlang tana mi chhuanawm ni tura tan la turin a fuih a. Zirlai kalchhuak turte an kal zelna turah duhsakna a hlan bakah final exam a zirlai fail te pawh rilru beidawng lo a theihtawp chhuah zel turin a fuih bawk a. Higher & Technical Education Minister chuan hlawhtlinna nei tur chuan kan kal zel dan tur ngun taka chhut a tul thu sawiin, hemi kawngah huaisenna, rinawmna leh tumruhna a pawimawhzia zirlaite a hrilh a. Government Hnahthial College-in kawng hrang hranga hmasawnna an neih chu zirtirtute leh zirlaite thawhrah nih thu sawiin,college infrastructure tha tak an neih te chu hmang tangkai zel turin kalkhawmte a chah a. “Sawrkar hna in min daih tawhlo tih kan chian a tul a ni”, tiin zirlaite chu eizawnna ngelnghet ngaihtuah chunga rilru nei taka lehkha zir turin a chah bawk a ni.

Vawiin inkhawm hi T. Tlangthanmawia, General Secretary, SU in a kaihruai a. Pu Vanlalhema, Principal, Government Hnahthial College leh Pi K. Lalhruaitluangi, BDO Hnahthial ten zirlaite fuihna thu an sawi bawk a ni.

Government Hnahthial College hi kum 1979 khan din niin tun dinhmunah hian zirlai 105 an awm a. Zirtirtu 29 awmin thawktu dang (Non Teaching staff) 10 an awm a ni. University graduation exam 2017 ah pass percentage 65.3% an nei a ni.