No.6907/2020-2021
Vawiin khan Mizoram leh Japan Sawrkar thawhhona Technical Cooperation Project (TCP) hnuaia Joint Coordination Committee (JCC) chu a vawi 5-nan Addl. Chief Secretary Pu JC Ramthanga hovin Chief Secretary’s Conference Room, MINECO ah neih a ni.
Meeting-ah hian Mizorama JICA hnuaia Technical Cooperation Project kalpui dan sawipui niin, 1st Pilot Project leh 2nd Pilot Project kalpui mekah department hrang hrang hmalakna te leh harsatna te sawi a ni. Tunah hian he TCP hnuaia first pilot project chu hlawhtling taka zawh a ni tawh a, Follow Up Activity Plan kalpui mek a ni. 2nd Pilot Project hna hi Lamchhip, Tlangsam leh Bilkhawthlir N ah te thawh mek a ni a, COVID19 hrileng avangin inbuatsaihna anga hmalak a harsat thu leh a khaihlak hlek thu ngaihthlak a ni.
Technical Cooperation Project (TCP) hi Mizoramin ei leh bar kan intodelh theih nana JICA in masterplan a lo siam tawh tihhlawhtlinna tura step pawimawh tak a ni a, he TCP in a tum ber chu Japan thiamna, Mizoram sawrkar hnathawkte leh lo neitute hnena hlan chhawn a, kalphung mumal zawk kan neih theihna tura guideline leh manual te duan a ni. He project ah hian Agriculture, Horticulture, Land Resources & Water Conservation Department leh Irrigation and Water Resources Department ten Pilot Village ah te Block Agriculture and Irrigation Development Committee (BAIDC) system hmangin hna an thawk ho a; he kalphung thar hi project zawh hunah Mizorama hman chhunzawm tura beisei a ni.
He Meeting ah hian TCP in tihhlawhtlin a tum ber pakhat - BAIDC system duan chhin chu enho a ni a, tha tih tlan a ni. He kalphung thar BAIDC system hi second Pilot Project ah enchhin zelin, kum 2022 atang chuan Mizoram puma hman tura beisei a ni a. He BAIDC system hian a tum ber chu kut hnathawktute nena sawrkar thawh dun dan tur duanchhuah leh tun hma atanga sawrkarin tihhlawhtlin a lo tum tawh agriculture kaihhnawih department hrang hrang te awmze nei leh kalphung nghet nei a kalho theihna (convergence) tur duan chhuah a ni.
BAIDC system duanchhuahna tur, JICA hnuaia TCP hi kum 5 (July 2017- June 2022) chhung awh tur a ni a. Mizorama RD Block pathum -Bilkhawthlir, Aibawk leh Champhaiah te hmalak mek a ni.
Meeting-ah hian Irrigation and Water Resources Department bakah a kaihhnawih department dang hotute an tel a. JICA Headquarters, Tokya; JICA, New Delhi atang tein JICA Project team te leh Central Water Commission aiawhte video conferencing hmangin an tel bawk.
