Mizoram sorkara Higher & Technical Education Department thuchhuahin a tarlan angin kumin 2011 State Technical Entrance Examination Results angin Medical leh Engineering-a lut turte tan Counselling leh Seat Allotment te tluang taka zawh a ni.

H&TE Department thuchhuah chuan Agartala Govt. Medical College-a MBBS zir tur thlanna chungchangah chanchinbu-ah leh tlang kamah te, Selection Committee/Board-in Counselling an neihpuinaa thudik lova senso sang tak pek ngai nia naupangte hrilh anga puhmawhna awm te chu hetiang hian a rawn sawifiah bawk a ni :-

T.Lalhmingliana s/o T.Laldingliana, he MBBS seat thlang thei chuan senso pek tur a san avanga la ngam lovin BDS senso tlem zawk chu a thlang ta a ni, tiin chanchinbuah te tarlan a ni a. Hemi chungchangah hian Agartala Govt. Medical College-a zirna hi hmun danga MBBS seat neih ang lovin, zirlai/naupangtem Pro-rate anga fee an pek a ngai a. Heta an senso tur fee leh thil dangah Rs. 2,00,000/- (nuai hnih) chuang pek a ngai a ni. T.Lalhmingliana pawh Counselling-na ah MBBS seat dang zawng zawng, a aia rank sang zawk ten an thlan zawh tawh hnuah, Agartala Medical College-a seat a la awm thu leh fee pek ngai leh senso ngai awm thei tur thu hrilh a ni a. Tum khata pek tur leh tur loh emaw Rs.3,00,000 (nuai thum) pek a ngai tih a hnenah engmah sawi a ni lo.

T.Lalhmingliana hian zirna tura senso ngai lo awm thei-ah thu tawp siam thei tura an tel a tul thin, a Pa emaw a Nu emaw Counselling-ah hian a rawn kalpui lova. An chhungkaw sum dinhmun thlirin nuai 2 chuang han sen chu ngam lovin he MBBS seat hi a hnar ta a, tichuan BDS Gauhati chu a thlang ta zawk a ni.

Agartala Medical College-a zirtur naupang chuan Admission-ah Rs.1,05,000/- pek a ngai a, a kum lehah hetiang zat vel bawk hi pek leh a ngai thin a ni.Tichuan  Rs.2,00,000 chuang hi pek ngei a ngai a ni. T.Lalhmingliana hian he seat hi chiangkuang takin a ‘decline’ tawh a, a aia rank hniam zawk hnenah he Agartala Govt. Medical College-a MBBS hi a thlan vanga pek a ni ta a ni.