Vawiin khan Mizoram Remote Sensing Application Centre (MIRSAC)-in Remote Sensing leh Geographic Information System (GIS) thiamna hmanga Mizoram chhunga leimin duhna hmun leh tuilen theihna hmun Atlas an buatsaih chu Planning Minister Pu H.Liansailova’n a office chamber-ah a tlangzarh.

He tlangzarhna inkhawm Planning Commissioner & MIRSAC Chairman Pu Lalmalsawma kaihhruaiah hian Minister chuan thu sawiin tunlai thiamna hmanga MIRSAC-in Mizorama la awm ngai lo Atlas 3 chhuanawm tak tak a chhawpchhuak theih chu a lawmawm hle a ni, a ti.  Mizoram chu lirnghing hlauhawmna hmunah a awm a, leimin leh tuilian te pawh kan tuar fo thin a, chuvangin sorkar leh mipuite pawhin hetiang chhiatrupna thleng thei lakah kan inven leh inbuatsaih lawk a tul hle a. In leh lo kan dinna turah pawh hetiang Atlas hi tangkai em em a, MIRSAC Map buatsaih thin te chu sorkar pawhin project leh plan a siamnaah a hmang tangkai hle a ni, a ti bawk. Mizoram pawn atanga mithiam rawih ngai lova kan ram chhung ngeia hetiang thiamna nei chhawr tur an awm ta hi hmasawnna  leh intodelhna a ni zel bawk, Minister chuan a ti.

MIRSAC Project Director Dr.R.K. Lallianthanga chuan power presentation hmangin satellite thlalak hmanga an zirchian dan a tarlang a. Mizoram pumah leimin duh zualna lai chu 8.65% a tling a, Aizawl khawpui chhung bikah chuan leimin duhna lai chu 20.75% leh leimin duhzualna lai chu 1.32% a ni a. Mizoram pumah tuilen duhna hmun chu 37.25 sq.km. lai a tling a ni. Heng an zirchianna te hi a map-in Atlas-ah hian tarlan vek a ni.

Vawiin Atlas tlangzarh hi bu pathum - 1) Mizoram puma leimin duhna lai - Landslides Hazard Zonation of Mizoram, 2).Mizoram khawlian deuh deuh 11 thlan chhuaha leimin duhna chipchiar zawka zirna - Micro-level Landslide Hazard Zonation leh 3).Mizoram chhunga tuilianin a chim hlauhawm lai Map - Flood Prone Areas Map of Mizoram- te an ni a. Tlangzarhna inkhawmah hian MIRSAC Executive Member leh Scientists te, Disaster Management & Rehabilitation, PWD, ADA, District hrang hrang aiawhte leh mithiam sawm bikte an tel a ni.