Mizoram sawrkara Planning & Programme Implementation Department chuan thuchhuah siamin BPL Baseline survey dik leh rintlak neih a nih theih nan tehfung fel tak ruahman a ni, a ti.

Official data dik leh rintlak neih hi Mizorama retheite chawikanna atan hnathawh dan tur dik leh fel taka ruahman a, policy mumal tak siam nan leh ram dinhmun dik tak hriat nan a pawimawh tih hriain Mizoram sawrkar chuan official data dik leh rintlak neih tumin tan a la mek a. He a hmalakna peng hrang hrang zinga pawimawh tak chu BPL baseline survey chungchang hi a ni. Chak leh dik taka hna thawh a nih theih nan State, District leh khua/veng level-ah monitoring committee a din bawk.

Tehfung thar hmanga BPL list siam a nih dawn tak avangin rethei tak tak,mahni a intungnung zolo bak chu BPL huangah khung luh theih a ni dawn lo a. Tanpuina beisei avanga BPL nilo, BPL list a khung ve mai a rem dawn lo a ni. BPL dik tak ni lo, list a lo awm palh hlauh an awm pawhin list enfel a nih hnuah thil zahthlak tawp a ni dawn a, mi tin fimkhur hle turin Planning Department chuan a hriattir nghal bawk. BPL nih loh theih hi lawmna tur a ni a, BPL ni lova BPL list a awm hi Mizo tan thil a ni tih pawm tur leh mi retheite nihna dinhmun dik tak he baseline survey-ah hian ziahluh a nih theih nan tan la theuh turin mipuite a sawm a ni.

Mipui tam takin BPL baseline survey hi rethei thlanna emaw an ti ang tih a hlauhawm a. BPL baseline survey in a tum ber zawk chu rethei dik takte dinhmun hriat leh tute nge an nih zawn chhuah a nih avangin rethei thlanna ni lovin rethei dik takte dinhmun hriatna tur leh zawn chhuahna tur zawk a ni. Rethei dik tak ni lo tarlan palh a awm a nih chuan anmahni tan leh chutiang mi dik lo taka lo dah lut mai duhte tan thil zahthlak tak a ni dawn a, fimkhur taka hna thawk turin Planning & Programme Implementation Department chuan District level Monitoring Committee leh Village/Local level Monitoring Committee te a chah a ni.