Vawiin khan Mizoram chhunga inbiakpawhna leh a kaihhnawih chungchanga thurawn petu Telecom Advisory Committee (TAC) chu Arya Mess, Mizoram Police HQ-ah an thukhawm a. TAC ah hian Lok Sabha MP Pu C.L.Ruala leh Rajya Sabha MP Pu Lalhmingliana te chu Member an ni a, vawiin meeting ah anni bakah TAC member dangte leh Mizoram SSA, BSNL a hotute an tel bawk a ni.
Rajya Sabha MP Pu Lalhmingliana chuan TAC member te thahnemngaihna zarah telecom services hrang hrang te chu tih changtlun chho a ni zela mahse BSNL service te chu duhkhawp a la tling lo a tiin an service te chu tun aia tha zawka duan a tul thu a sawi bawk. Lok Sabha MP Pu C.L. Ruala chuan service a that loh vangin BSNL hmangtute an lungawi lova, service provider dangah an insawn a, hemi avang hian BSNL chuan sum an hloh a tiin service pe tha tura tan lak a tul thu a sawi tel bawk a ni. Thingtlang lamah internet service a that loh vangin bank branch thar hawnna kawnga harsatna a awm thu Pu C.L. Ruala hian a tarlang bawk a ni.
BSNL Mizoram SSA GMTD Pu P.S. Rama Raju chuan Mizoram SSA chungchanga report tawi a pe a. Report-ah a tarlan dan chuan BNSL in kum 2011-2012 khan Mizoram atanga sum a hmuh chu cheng vaibelchhe 42.17 a ni a, hei hi nikum aiin za zelah 14.37 in a pung a. Kum 2010-2011 khan BSNL sum hmuh hi cheng vaibelchhe 36.87 a ni. 2011-2012 chhung khan BTS site 24 thuamthat a nih thu Report-ah hian a tarlang bawk a ni.
DGM (CM) Pu C Lalhmachhuana chuan 2011-2012 chhunga BSNL hnathawh dan thlirletna hun leh hmalakna hrang hrang te sawizauna hun a hmang a. TAC member te chuan BSNL service hrang hrang a bikin internet, 3G leh mobile service te a nih dan ang taka an hman theih lo fo thu te leh hemi avanga mipui in harsatna an tawh thu te an sawi a, service tha zawka BSNL in an pek theih nan thurawn an pe bawk a ni.
TAC Member dangte chu Pu C.Chawngkunga, Pu Thanglura, Pu B.C. Lalbiakngura; Pu K. Lalnghakliana; Pu Ngaihkhuma Ralte; Pu H Lalzarliana; Pu Vanlalhmuaka leh Pu L.C. Roula te an ni.
March ni 31 2012 thleng BSNL hnuaia connection hrang hrang awmzat chu DEL(Wired) – 45543; WLL – 16048; GSM – 191269; STD PCO – 518; Broadband – 8428; INPCO – 399; Leased Lines – 203; EVDO – 697; NIC – 238; 3G Data Card – 52 leh WiMAx – 10 te an ni.
