“Thalaiten mahni hnam ngaihsan a, Mizo kutchhuak thilte ngaihhlut nachang kan hriat a ngai,” Minister of State Pu Lal Thanzara chuan a ti. He thu hi vawiina Hrangbana College Week kharna a hmanpui naah a sawi a ni. He hunah hian week chhunga zirlai tithate hnenah lawmman a hlan bakah Minister hian Hrangbana College Career and Counselling Cell room siam thar a hawng nghal bawk a ni.

Pu Lal Thanzara chuan lehkha zirlai mai bakah extracurricular activities hrang hrangah te inhnamhnawih hian zirna a ti kimchang ani, a ti a. Khawvel changkang chho zelah kawng engkimah hmasawnna in min deng a, changkan tumin Mizote kan tlan nasa hle a. Sum leh pai umna kawngah diklo taka pawisa chiahpuam duh mai thinte pawh an awm zel a; diklo taka hausak duhnate hi umbo a, sum leh pai chungchanga ngaihdan siamthat a, mahni hnam chawisan zawk a tul tawh thu sawiin, hemi kawnga hmala tur hian thalaite an pawimawh hle a ni, Minister chuan a ti a. Zirtirtute leh zirlaite inkarah inpawhna tha tak neih a pawimawh thu sawiin, tunlai thalaite zingah harsatna hrang hrangah tawh theih a ni tiin, Career and Counseling Cell chu hmang tangkai turin zirlaite chu a fuih bawk.

Minister chuan zirlaite chu hna zawn kawngah pawh zau taka thlir thiam a, sorkar hna a innghah tum rigawt lo turin leh, thalaite hna hmuh theih nana Sorkar hmalakna awm mekte chu ngaihven turin a fuih a. Zirlaite chu nakin lawk a ram leh hnam hruaitu turte an la nih angin, tun atanga thainghlim tak leh uluk taka an nun vawng turin Pu Lal Thanzara chuan a chah a ni.

Govt. Hrangbana College Week hi vawi 34 an hmanna niin, a kharna inkhawm hi Hrangbana College Golden Hall-ah neih a ni a. He hun hi Hrangbana College Principal Pu Lal Rinawma’n a kaihruai a ni. Tunah hian he college hian zirlai 1800 bawr vel a nei a ni.