Ni hnih 25 - 26 November chhung awh tur ‘Thalfavang Kut 2011’ chu vawiin khan Art & Culture Minister Pu P.C. Zoramsangliana’n Hmuifang Tourist Resort-ah a hawng. Kut hawnna hi Tourism Secretary Pi B. Sairengpuii-in a kaihruai a, Kut hmang tura kal zawng zawng lawmna thu a sawi bawk a ni.

Khuallian Minister Pu P.C. Zoramsangliana chuan Kut hawngin, sorkar laipuiin kum khat chhunga festival vawi 4 hman a phalsak chu remchangah lain intihlimna hun siam leh zinmite hip nan, Mizo hnam ziarang, lam leh zai, incheina leh Zonunmawi te phochhuahna hun tha tak neih a ni theih hi a lawmawm takzet a ni, a ti a. Cheraw World Record leh Commonwealth Games avangin Mizoram chu khavwel hriat a hlawh chho zel a; chuvangin Tourism Department hmalaknain Mizoram hmun nuam tak takah te Kut leh intihhlimna hunpui, Mizo hnamzia leh themthiamna phochhuahna hun siam hi Mizote tan hmingthanna leh hmasawnna a rawn thlen zel a beisei thu a sawi a. Kut hmang tura lo kal zawng zawngte chibai bukin kumin Krismas lo thleng turah pawh hun tha leh hlimawm tak Mizoram mipuiten an hman theih nan duhsakna a hlan a ni.

Vawiin Thalfavang Kut hawn ni ah hian Mizo lam chi hrang hrang - cheraw, sarlamkai, khuallam leh tlanglam te entir a nih bakah zaipawl, malzai leh tunlai lam leh zaiin mipui kalkhawm an awi a. Mizo kutchhuak handloom, grape wine leh themthiam thil chi hrang hrang zarwhna stall engemawzat pawh Kut chhungin a awm dawn a ni.

Naktuk Kut ni hnihna leh kharnaah hian Mizoram Governor Pu Vakkom Purushothaman chu Khuallian a ni ang a, Kut kaihruaitu-ah Parliamentary Secretary Pu H. Zothangliana a ni ve thung ang. Thalfavang Kut hmang tur hian Tourism Department chuan a duh apiang Hmuifang Tourist Resort pan turin a sawm a ni.