Thalfavang Kut 2013 chu vawiin khan Hmuifang Tourist Resort ah Mizoram Larsap Pu Vakkom Purushothaman chuan a hawng.

Ni hnih chhung awh tur kumin Thalfavang Kut hawnna thuchah a sawiah Governor chuan Mizoram state ralmuang leh a mi cheng bengvar leh hawihawm takah hian khualzinte hip theihna tur tourism development chak taka kalpui theihna remchang tam tak a awm a ni, a ti a. Tourism lama hmasawnna hian state sum hnar tha tak a siam thei a, sum leh pai inbenbelna chhenfakawm tak a thlen theih avangin tourism ti chak tur hian hnam ziarang lam leh rimawi tih hmasawnna cultural development pawh uar lehzuala kalpui a tul a ni a ti. Pu Purushothaman chuan Mizo lam leh rimawite hi rampumah pawh a lar sawt hle a ni tiin tunhnai lawka International Film Festival Goa khawpuia an neihah pawh Mizo lam leh rimawite chu mitla ber pakhat a thling a ni a ti.

Thalfavang Kut hawnna inkhawm hi Tourism Department Director Pu Vabeiha chuan a kaihruai a. Tuntum hi Hmuifang hmunah an nghah vawi 3 na a nih thu leh state chhung leh pawn atanga khualzin veivak hipluhna tura buatsaih thin a ni a ti.

Governor hian Hmuifanga Tourism Department Conference Hall chu a hawng nghal a ni.

Vawiin hawnna inkhawmah hian hmanlai pipu te zai leh lam; tunlai thangtharte zai leh lam; Pipe Band; thlalak mawi tak tak pholan leh zawrh; lehkhachaih chaih; Handloom pholan leh zawrh leh eitur thahnem tak a awm  a. Advance Krismas hawi pawha hman theih tur hun hlimawm tak hman a ni. Naktukah Thalfavang Kut hi chhunzawm lehin tlai lamah khar a ni ang.

 

Attachment

  • Loading attachment...