Ni thum awh Thalfavang Kut chu nimin khan bialtu MLA, Deputy Speaker Pu R.Lalrinawma'n a khar. Mizoram sawrkara Tourism Department buatsaih he Kut hi Tuirial Airfield-ah hlawhtling taka neih niin Mizo hnam ziarang phochhuahna leh tunlai thiamna changkang ber ber hmanga intihhlimna hun hman a ni.

Kut khartu Deputy Speaker Pu R.Lalrinawma chuan ni thum chhungin Tuirial Airfield-ah thalai talent nei tha tak tak ten mit leh beng titlaitu thil tam tak an entir a, a hlimhlawp zawng ringawta hmang ral lovin Mizo thalaite tan mahni talent dawn tihpunna leh hman tangkaina hun remchang a ni, a ti. Kum tluanin rim takin hna kan thawk a, thawkrimte tan hahchawlhna leh intihhlimna hun buatsaih chu thil tha tak a ni a, Pathian pawhin thalai kan nih lai hian Amah hrereng chunga kan thatlai hun kan chen a phal a ni, a ti a. Mizoram Tourism tihlarna hmanrua Thalfavang Kut hlawhtling taka neih a ni chu lawmawm tiin Pu R.Lalrinawma chuan Mizoram State sawrkar sum pur hauh lovin sawrkar laipuiin Kut hmanna tur bik atana sum a pek hmanga neih a nih thu a sawi nawn leh a ni.

Ni thum chhung hian intihhlimna chi hrang hrang neih a ni a. Hnam lam chi hrang hrang bakah zaithiam zai leh concert puitham tak nitin buatsaih a ni a. Paragliding, powered hand-gliding leh hot air balloon-ah man chawia chuan theihna siam a ni a. Professional stunt show leh bike leh car intlansiakte, thal inkahsiak te, rifle inkahsiakte leh carnival a awm bakah Mizo kut chhuak puan leh thiamhnangdeh lam hawi leina tur stall engemawzat a awm a, ei leh in tuihnai tak tak Food Court-ah lam mai theihin a awm bawk.

Kharna inkhawm hi Tourism Department Joint Secretary Pu Thangchem Zathang in a kaihruai a. Tourism Minister Pu John Rotluangliana, Parliamentary Secretary Pu TT Zothansanga, Tourism Secretary Pu V.Lalremthanga leh official dangte pawh an tel.

December ni 10 atanga hman tan Thalfavang Kut neih chhung hian Mizoram chhung leh pawn atangin mi engemawzatin an tlawh a. A khar ni hian mi sing chuang in an tlawh a ni.