Vawiin khan Eirawngbawlna Gas (LPG) chungchangah Supply Minister Pu John Rotluangliana hovin a office-ah IOC lam hotu pawimawh tak tak te chuan Mizorama Bottling Plant leh Depot thar dinna tura thu pawimawh tak sawiin inkawm hona hun tha tak an hmang a. He hunah hian Parliamentary Secretary Pu TT Zothansanga leh Pu Hrangtawna, Transport Secretary bakah Pu Lalngaisang Khawzawl, Sr. Branch Manager; Pu Dipankar Roy, Executive Director, IOCL bakah IOC lam mi pawimawh tak takte an tel a ni.

Mizoram ah hian Gas duh angin kan hniang hnar loh avangin hmalak belh zel tum a ni a. Chumi atan chuan Bottling Plant leh Depot neih belh hi tih makmawh a ni a. Hemi kawngah hian kum hmasa lam atang tawhin Sorkar Laipui Petroleum Minister hnenah pawh thlena hma a lo lak tawh thu Pu John Rotluangliana chuan sawiin Mualkhang Bottling Plant hian min chawm zo tawh lova, chuvangin a thar neih belh dan kawng zawn mek a nih thu a sawi.

Hetiang hun atan hian Rel Station atanga hla lo mamawh engkim lam theihna hmun Aizawl leh a chhehvelah hian hmun tha tak tak hual a nih tawh thu IOC hotute hnenah hian thlenin Supply Minister chuan kan ram tana Gas hniang hnar theihna tur a nih bakah Industry lama hmasawnna tur anih dawn bawk avangin theih tawpa chaka hmalak pui turin a sawm nghal a, retail outlet min pek belh loh chuan depot kan nei lova, chuvang chuan selection tih fel sak tur leh depot dahsak ngei turin a thlen a. LPG Distribution ah thingtlang leh Aizawl kan harsat dan zawng zawngte hrilhin proposal an thehthlakte bawhzui saka hmalak pui turin a lo ngen nghal a ni.

Vawiina thukhawmte hian Aizawl leh a chhehvela remchang awm hmun hrang hrang an sawiho te chu bawhzuiin a hmunhma te enfiah turin vawiin vek khan an thawk chhuak nghal a ni.