Vawiin chawhnu khan Tourism Minister Pu John Rotluangliana hovin a office chamber-ah Thalfavang Kut Organising Committee chuan Thalfavang Kut 2016 hman dan tur an rel.

Kumin Thalfavang Kut inbuatsaihna atana thutkhawm vawikhatnaah hian Kut hman hun leh hmun te tihfel a ni a. December ni 15 atanga ni 16 chhungin Tuirial Airfield hmunah neih leh tum a ni. Kut chhung hian Mizo culture kaihhnawih hnam lam leh zai te bakah adventure sport lam hawi intihhlimna chi hrang hrang, ei leh in tur leh bazar-na tur stall te siam leh tum a ni. Tualchhung leh state dang tourist-te hip thei tur hmarchhak state dang atangin rock band tha te chah chhuah tum a ni bawk.

Meeting-ah hian Tourism Secretary Pu V.Lalremthanga bakah Department hrang hrang hotute an tel a ni.