Vawiin dt. 7th November, 2014 hian Pu John Rotluanglian, Tourism Minister hovin a office chamber-ah December 10 - 12, 2014 chhunga Tuirial Airfield ah Thalfavang Kut Cum Youth Festival 2014 buatsaihna tur chungchangah meeting pawimawh tak neih a ni a. Pu T.T. Zothansanga, Parliamentary Secretary, Tourism pawh he meeting ah hian a tel a ni.
Pu John Rotluangliana Minister chuan tuna Thalfavang Kut cum Youth Festival kan hman vawikhatna tur a nih avangin kan tihfuh chuan dinhmun sang taka kan inhlan kaina tur a ni tih hre rengin a mawhphurtu tura ruatte pawhin theihtawp kan chhuah a tul a ni a ti a. He festival hi holam mai mai a hmang liam lova Mizote kawng hrang hranga kan hmasawnna hmel pho lanna tur a ni tih hria a chhim theuh turin Minister chuan mipuite a ngen a ni. He meeting-ah hian Thalfavang Kut cum Youth Festival a mawhphurtu hrang hrangten an inbuatsaihna te report pe in ngaihtuah zui a ni insiam that ngaite siam tha in pawm a ni bawk.
He Thalfavang Kut cum Youth Festival ah hian motor sports chi hrang hrang te, silai inkahsiak te, Hnam lam chi hrang hrang te, Carnival te, zaithiam hrang hrang zai te leh Beat Group te bakah Mizoram chhunga awm hnam hrang hrangten hnam lam an entir dawn a ni.
He meeting-ah hian Pu Vabeiha Hlychho, Director Tourism bakah Department hrang hrang hotute, MCO aiawhte, MMSA aiawhte, MAA aiawh te, Mizoram Aerosports aiawh te leh sawm bikte an tel tha hle a ni.
