Thalfavang Kut Working Committee chu vawin khan an Chairman Pu V.Lalremthanga, Tourism Secretary hovin a pisaah an thukhawm.

Meeting-ah hian Organising Committee in a lo rel tawh angin December ni 10 atanga 12, 2015 chhunga Tuirial Airfield-a Thalfavang Kut hman dan tur chipchiar an duang a. He kut hi Sawrkar Laipuiin State-te tana tourism hmasawnna tur ruahmanna a siam zinga hmalakna pakhat niin a senso pawh sawrkar laipui tum tur a ni a. Ram chhung leh pawn atanga khualzinte hipna tura ruahman ni mahse a taka sap tourist tam tak an lo la kal theilo a nih pawhin a khawtual mite tana intihhlimna leh hawi thawvenna remchang a nih ngei Committee chuan a beisei a ni.

Festival hlawhtlinna tura mamawhte sawiho niin chanvo hrang hrang neitu tur ruat an ni a. A panna kawng chei that dan tur te, tui leh kawlphetha lak dan tur te, traffic, security, medical leh tul dangte an sawiho. Ram chhung leh pawn a miten he Kut hi an rawn hmelhriat a, chhim chakawm takasiama nih theih nana tihlar dan turte pawh ngaihtuah a ni.

Kumin Thalfavang Kutah hian hnam lam leh zai, cultural thil piahlamah intihhlimna chi hrang hrang buatsaih tum a ni a. Food Stall changtlung tak, a hranpa hlaka siam tum a nih bakah thiamhnangdeh lam thil zawrhna te, puan leh Mizo traditional thil chi hrang hrang zawrhna hmunte siam tum a ni a. Mizoram Aeromodellers Association, Mizoram Aerosports Association leh Mizoram Motor Sports Association bultumin hot air balloon, paragliding, power handgliding, bike racing, four wheeler racing te neih tum a ni a. Hmun dang atanga mithiam professional stunters-te chahlutin motorbike stunt hmuhnawm tak tak te en tur a awm dawn bawk a ni.