Finance Minister Pu Lalsawta chuan vawiin khan a bial chhung Chite leh Armed Veng South tlawhin Mizoram mipuite thawh chhuah tipung tur leh ram a lo hausak theih nan New Economic Development Policy (NEDP) hmangin sawrkar chuan thar tam a buaipui dawn, a ti.

Pu Lalsawta chuan NEDP laimu chu ‘tang puihna’ a ni, a ti a. Lehkhathiam leh mi hausa te chu NEDP kaltlanga hmalak puiah sawmin hlawhtlin tum tak tak te chu sawrkarin a tanpui dawn a ni, a ti. Finance Minister chuan sawrkar hmalakna thar NEDP hmangin thar chhuah hralh duhtute leh a lei duh sumdawngte suih rem an tum tih sawiin hlawkna tel tur awm si lo a tih duat ai chuan hlawhtling tur khawpa bur chat a, ramdanga thawnchhuah tham khawp thar chhuah chu sawrkar hmalak tum dan a ni, a ti.

Aizawl East II bialtu MLA Pu Lalsawta chuan Armed Veng South chhunga motor ke pali nei tlan theih na tur kawng sial mek a hmunah a tlawh a. He kawng hi ke a kal theihna kilometer khat dawna thui niin kawng sial nan MLA Local Area Development fund atangin sum cheng nuai 15 a lo pe tawh a ni. Kawng sial hna hi kumin August 29 khan bul tanin, meter 250 vela thui an sial tawh a. Lei laih nan khawl hman a rem loh avangin mihring tha vek hman a ni. Kawng hian mimal ram engemawzat a paltlang a. A paltlang ram neituten khawtlang thatna tura ram a thlawna an pe chu fakawm leh entawntlak a tih thu Minister hian a sawi. Khawtlang hruaitu kalkhawmte fuihin hmasawn tura tan an lak phawt chuan sawrkarin a tanpui zel dawn a ni, a ti bawk.

A bial chhung Chite Venga Chite Inpui sak mek pawh Finance Minister hian a tlawh a. Chite Inpui hi Chite Veng mipui ten indoor games khelh nan leh pui pun nan te, an mamawhna apianga hman theih tura duan a ni. A dung ft 50, a vang ft 24 vela zau niin Pu Lalsawta hian a sak nan MLA Fund atangin cheng nuai 15 a lo pe tawh a. Sak chhunzawm zel dan tur ngaihtuahin vawiin hian bialtu MLA hian a hmunah Chite Inpui saklai hi a tlawh a ni.