Mizoram Youth Commission leh Emporium Training & Consultancy (ET&C) Pvt. Ltd te chuan vawiin khan Mizoram Youth Commission Chairman Pu T Sangkunga office-ah thawhhona thuthlung an ziak.

Thawhhona thuthlungah hian Mizoram sorkar aiawhin Youth Commission Secretary Pu JT Vanlalngheta’n a hming a ziak a, Emporium Training & Consultancy Pvt. Ltd. aiawhin an Director Pu Piyush Kheria chuan hming a ziak ve thung. Mizo thalai 250 te tan Certificate Course hrang hrang - Aviation & Hotel Hospitality, Travel & Tourism Management, Retail Management, BPO Training leh Spa Training-te pek an ni ang a, training chhuakte chu ram chhung leh ram pawn Company lian leh rintlak hrang hrangah hna zawn sak an ni ang.

Pu T Sangkunga chuan khawvel hmasawn zelah mithiam an lo pun chhoh zel avangin inelna pawh a sang hle a, hna tha hmu tur chuan rintlak leh chhawr tlak thiamna bik neih a tul ta hle a ni, a ti. Mizo thalaite tana a thlawna training pek mai bakah hna tha hmuhsak thei tur nia an ngaih zirna in, ET&C nena thawhhona thuthlung an ziak thei chu lawm tiin Mizoram Youth Commission Chairman chuan sorkar lam leh company lamin mawhphurhna an neihte tha taka an hlenchhuah a, Mizo thalai ten an thawhhona rah tha an tel ngei a beisei thu a sawi a. Heng an hmalakna kal mek hi Mizoram Chief Minister Pu Lal Thanhawla thahnemngaihna leh hriatpuina a bul tan a nih thu a sawi bawk.

Inremna ang hian MYC chuan advertisement tichhuakin DPR a buatsaih anga, Mizo zirlai Graduate chin chunglam 250 thlanchhuah te chu ET&C Pvt.Ltd., Kolkata a an training centre-ah a thlawnin training pek an ni ang. Training an zawh veleh hna zawn sak an ni ang a, thla khat chhunga hnathawh tur an hmuhsak lo a nih chuan hna an hmuh hma zawng training chhuak hna hmu lote hnenah tanpuina thlatin cheng 8000 an pe thin dawn a ni.