Mizoram Sorkar a Disaster Management & Rehabilitation Department (DM & R) leh GeoHazards International tangkawp chuan Aizawl Khawpui hi Lirnghing leh Leimin laka a him zawk nan thawhhona thuthlung MoU an ziak a. He MoU hi Principal Secretary, DM & R, Pu P.C. Lallawmsanga leh GeoHazards Society President Pu Hari Kumar ten nimin khan an ziak fel a ni.

He thuthlungah hian Mizoram Sorkar chuan engmah senso tur a nei ve lovang a, GeoHazards International hian kum 2 chhung an project thawh tur ah senso zawng zawng an intum dawn a ni. Hetiang taka Aizawl Khawpui tana an inpekna hi DM & R Department theihtawp chhuahna zar a niin hetianga Sorkar sum seng miah lova GeoHazards International-in hnathawh an rawn tum ang hi Mizorama thil thleng ngailo a ni a. He Project hi kum 2 chhunga thawh tur a niin a senso zawng zawng hi an tum vek tur a ni. Hei hi a hluin Sorkar Department hrang hrang - PWD, PHE, AMC, MIRSAC, UD & PA, LR & S, GM & R a Engineer, Architect, Geologist leh mithiam dangte leh YMA-te pawhin theihtawp chhuahin an lo tawiawm a ni. Aizawl an cham chhung 21 - 25 April, 2013 khan Aizawl veng hrang hrang te tlawhin leimin leh lirnghing laka eng ang chiaha him lo nge tih te an enfiah a. Heng an thil enfiahte hi an hmunpui San Francisco, USA ah an zir chiang ang a, October, 2013 ah Aizawl rawn tlawh leh an tum a ni.

GeoHazards International/GeoHazards Society aiawh te hi USA atangin mithiam 6 leh India atangin 5an ni a. Anmahni hi Earthquake Engineer te, Land use Planner te, Seismologist te, Geologist te an ni a. An hnathawh ah hian DM & R Department chuan theihtawp lo chhuahpuiin Chief Minister Pu lal Thanhawla, Finance Minister Pu H. Liansailova leh DM & R Minister Pu Nihar Kanti Chakma te pawn theihtawp chhuahin an lo dawngsawng a ni. Mizorama lo zin heng mithiamte hi vawiinah an haw dawn a ni.