Vawiin khan I&PR Department Serchhip hmalaknain New Serchhip YMA Hall-ah ‘Awareness Campaign on Mizoram Right to Public Services Act, 2015’ neih a ni a, Pu C.Ramengmawia, President, MJA Serchhip District chu khuallian a ni.

Khuallian Pu Ramengmawia chuan MRTPS Act chu kum 2015 atanga hman tan ni tawh mahse mipuiten kan la hmelhriat lo hle a. Dân kan hriat loh avangin sawrkar atanga hun reilote chhunga kan hmuh turte pawh rei tak tak kan nghak fo thin a, a pawi hle a ni a ti a, he dan hnuaiah hian sawrkar department panga seng luh tawh niin a lang a, department dang pawh sengluh an nih zel beisei ila, an sengluh tam poh leh mipui tan a hlu zual dawn  ani, a ti. He danin a tum ber chu hun bitiam chhunga mipuite mamawh sawrkarin lo pek chhuah hi a ni a, dan tha leh tangkai tak a nihzia a lang chho tial tialin a rinawm a ni, a ti.

Resource Person Pu K.Saitluanga, MIS, DIPRO, Serchhip chuan kalkhawm te chu The Mizoram Right to Public Services Act, 2015 chungchangah zirtirna a pe a, he dan hi ni 25 March, 2015 khan Mizoram Governor zahawm tak chuan hman phalna a lo ziah tawh thu sawiin, ni 1 December, 2015 atanga hman tan a nih thu a sawi a. He Danin a tum ber chu sawrkarin mipuite hnena ‘Service’ a pek chhuah thinte hunbi tiam chhunga a diltu hnena pek chhuah zat zat thin a ni, a ti. He dan hnuaiah hian vawiin thlengin ‘service’ 46 seng luh tawh niin, chung service neitu department te chu, Transport, Taxation, Social Welfare, Rural Development, Finance leh PHE Department a nih thu a sawi a. He dan nihphung leh a kalpui dan te, zualko theihna awm te leh a hman tangkai dan tur te chipchiar takin a sawifiah a. Chipchiar lehzuala lo inzir duh tan www.dpar.mizoram.gov.in ah download theih a nih thu te a tarlang a ni.

He hunah hian Govt. Serchhip College zirlai te, MUP New Serchhip South member te leh Serchhipa thuthar lakhawmtute an tel tha hle a ni.