Mizoram mipuite aiawha Parliament a thu tur thlanna Lok Sabha General Election neih zawh taka vote thlak tura lo thawk chhuak zawng zawng te chungah Pu Ashish Kundra, Chief Electoral Officer, Mizoram chuan lawmthu a sawi a, voters te leh inthlan buaipuitu official zawng zawngte thahnemngaihna avang leh khua leh tui tha an nih anga an tih tur an hlen avangin Lok Sabha Inthlanpui hmasa zawk aiin vote tla a tam phah a ni a ti a, abik takin kum upa lam leh rualbanlo te zingah vote a tla tha ni a a hriat thu sawiin thalaite pawhin tum dang aiin vote an thlak tha ni a a hriat thu a sawi a, hmalam huna Inthlanpui la neih leh zel turah pawh thahnemngai taka thawk chhuak thin turin Mizoram mipuite a chah nghal bawk a ni.

Inthlanpui neih zawh takah khan vote nei mi 787777 zinga mi 497091 in vote an thlak ahei hi za zelah 63.10 a ni. Mipa vote nei 383603 zinga 243954 (63.60%) in vote an thlak a, hmeichhe vote nei 404169 zinga 253762 (62.79%) in vote an thlak a ni. Mizoram chhunga Assembly Constituency 40 zingah Lawngtlai East ah vote a tla chhe ber a, vote nei 24183 awmin an zinga 12438 in vote an thlak a, hei hi za zelah 51.43 a ni. Vote tlak that berna bial chu West Tuipui niin vote nei zawng zawng 15063 zinga 11276 in vote an thlak a, hei hi za zelah 74.86 a ni.