Vawiin khan Serchhip DC Conference Hall ah Social Welfare Department leh DC Office Serchhip tangkawp buatsaihin sawrkar hnathawkte leh tlawmngai pawl aiawhten rualbanlote dikna leh chanvo humhalhna dan - The Rights of Persons with Disability Act, 2016 an zirho.

He hun hi Pu Biakliana, CDPO Serchhip in a kahhruai a, khuallian Pu Chuauhnuna, Addl. DC Serchhip chuan hawnna thusawiin, India sawrkarin rilru leh pianphunga rualbanlote a ngaipawimawh hle a, an dikna chanvo humhalhna dan a siam te hi alawmawm hle a ni, a ti a. Election Commission of India pawhin ngaipawimawhin, ram inthlanpuiah rualbanlote tana remchanna a siam thin thute bakah chhungkaw tinin rilru leh pianphunga rualbanlote dikna leh chanvo humhalhna kawngah rilru thar kan put a tul hle a ni, a ti bawk. 

He hunah hian Resource Person Dr. Christopher L. Hmar, Orthopadeadic Surgeon, MO Serchhip Ditrict Hospital hnen atangin rualbanlohna chungchang leh rilru leh taksaa rualbanlohna hrang hrang, Disability and Types of Disability chungchang a lem nen a zirtirna ngaihthlak a ni a. Resource Person dang Pi Lalmuanpuii Chawngthu, Co-Ordinator, Inclusive Education for Disabled at Secondary Stage(IEDSS), RMSA Serchhip chuan rualbanlote dikna leh chanvo humhalhna dan, The Rights of Persons with Disability Act, 2016 chungchang zirtirna a pe bawk. 

Vawiina The Rights of Persons with Disability Act, 2016 zirhona ah hian Serchhip a sawrkar hnathawk te, tlawmngai pawl hruaitute an tel a, Training zawh hian an thil zir atanga zawhna leh chhanna leh sawihona hun hman ho niin Pu R. Vanrengpuia, SDO (Sadar) in lawmthu sawina hun a hmang a ni.