UD&PA Minister Zodintluanga chuan 14.1.2013 a Lungleia Kuthna Thawktute Ni a hmanpui hnuah vawiin 16.1.2013 hian Thehlep khua, motor la,luh ngai lohna khua tlawhin tukthuan a ei. Thehlep khua hi motor kawng la tlang ngai lohna khua a ni thin a, tun hnaiah motora kal theihin kawng hi sial tlang a ni. Thehlep khaw mipuite hian Minister Zodintluanga hi lo hmuakin an khaw mamawh hrang hrangte an lo thlen a, a theih ang anga hmalaksak Minister hian a tum a ni.

Minister Zodintluanga chuan, Thehlep khaw kawng motor kal tlang theiha a awm ta hi Thehlep khaw tan chuan hmasawnna ropui tak a ni a, heti anga motor a kal theih chuan hmasawnna dang pawh a lo thleng zel dawn a ni. Minsiter hian Thehlep Govt Middle School building sak tan mek chu a hmunah a enpui a, hnathawktute hnenah chak tak leh tha taka hna kalpui tura a hrilh bakah harsatna an neih chuan a hnena thlen vat thin turin a chah bawk a ni. Hemi hnu hian Minister hian Lunglei a pan a. Lunglei a thlen hnu hian Circuit House conference hall-ah Lunglei District SSA hotute nena inkawmin SSA hmalakna chi hrang hrang a sawipui a. SSA-in Lunglei District chhunga thingtlang khaw hrang hranga primary leh middle school building sak mek te chu tha taka sak a nih theih nan contractor lakah lo strict turin a chah a. Heng school building sak mekte hi ram rotling turte an nih avangin kum tlemte hnua chherawp mai tura sak a nih loh nan SSA hotute hi a chah a ni.

SSA hotute a kawm zawh hian Minister Zodintluanga chuan NLUP chungchanga hmalakna kal mekah Soil & Water Conservation Deptt hotute a kawm leh a. S&WC Deptt hotute chu thingtlang khaw hrang hranga NLUP an kalpuinaah tun aia tang lehzual turin a chah a, NLUP chu miretheite dawmkanna tur programme pawimawh tak a nih avangin tihduhdah leh lupan hnathawha thawh a rem lo a ni a ti. Deptt lam hotute pawhin Minister-in heti tak maia NLUP a tuipui leh a chhuizui peih lawmawm an tih bakah anmahni ngei pawh a tiphur thar hle a ni an ti.

UD&PA Minister Pu Zodintluanga hi Lungleia hna tul hrang rang a tih zawhah ni 16.1.2013 vek hian Aizawl pan tura beisei a ni.