104/2022-2023

Nikum November thla tir atanga Lunglei District-a hmalakna kalpui chhoh mek ‘MIPUI HNENAH KAL RAWH – GO TO THE PEOPLE’ Project chu nimin khan Lunglei DC Pu Kulothungan A hovin Thenhlum khua ah buatsaih a ni.

‘MIPUI HNENAH KAL RAWH – GO TO THE PEOPLE’ Project in a tum ber chu District mipui, a bik takin thingtlang khaw kilkhawr zawka cheng te tan Department te kaltlangin an khua ah ngei an mamawhte chhawpchhuah sak bakah sawrkar scheme hrang hrang te hrilh hriata, application thehluh tul te a hmuna tih fel pui saka, certificate siam sak te a ni. Hemi bakah hian an mamawh leh vei zawng hrang hrang sawrkar hnenah an thlen theihna hun siam sak a ni.

Nimin program-ah hian Lunglei DC Pu Kulothungan A,  SDC Pu Lalsanglura leh DC staff- te, H&FW Department, AH&Vety Department, Lead Bank, Agriculture Department, Green Ag te  an tel a. Thenhlum leh a chhehvel mipuite tan a thlawna mit entirna leh a mamawhte tan tarmit semchhuah, general physician hnena a thlawna inentirna leh damdawi sem, Covid Vaccination, Free Animal Health Camp, ran hri danna pek chhuak,  Bank loan leh scheme hrang hrang inzirtirna, Aadhaar enrollment thar leh siam that te, Tribal Certificate, Income Certificate leh Residential Certificate-te a mamawh tan an siam sak a ni. Hemi bakah hian khawtlang hruaitu VC leh mipuiten sawrkar hnena an mamawh thlen hun siam sak an ni bawk.

Lunglei DC Pu Kulothungan A chuan hawnna thu sawiin ‘MIPUI HNENAH KAL RAWH – GO TO THE PEOPLE’ Project chu nikum November thla khan Lunglei Distric-ah kalpui tan niin mipuiten an hlut hle a ni a ti a. Inkalpawhna te a that tawkloh vang leh lirthei harsatna avang ten thingtlang a cheng tam tak te tan District capital tlawh a harsa tih kan hriatpui che u a ni tiin Lunglei DC chuan Covid-19 hrilengin zia lam a pan zel chuan Department hrang hrang leh Bank te nen tangkawpin mipui mamawhte an khua ngei thlen sak zel nih tur thu a sawi a ni. He project ti hlawhtling tura Department hrang hrang official-te, DC office-a officer-te leh staff te thawhrimna leh inpekna avangin an chungah lawmthu sawiin tlawmngai pawl hrang hrang leh khawtlang hruaituten phur taka anlo tawiawm thin avangin lawmthu a sawi bawk a ni.

Nimin program- ah hian hun hlawhtling tak hman ho niin mipui thahnem tak an kalkhawm a ni.