2779/2024-2025

Dated Serchhip, the 30^th October, 2024: Mipuite hnen thleng phaka Sawrkar Department hrang hrang ten hna an thawh theihna turin Thenzawl Civil Sub-Division Office ruahmannain 'Fehchhuah Programme' vawikhatna leh a hawnna chu vawiin khan Buangpui VC Hall ah neih a ni.

Fehchhuah Programme hi Pu H. Lalmawia, Principal Govt Higher Secondary School chuan a kaihruai a. Dr. Ch. Lalthafamkima, General Manager, Vety Farm, Thenzawl chuan ASF chungchanga ran vulhtute hriat tur pawimawh a sawi a. Pu Lalzidinga Kawlni, Officer Incharge, Thenzawl Police Station chuan New Criminal law nihphung te leh  dan leh thupek chungchanga mipuite hriattur pawimawh hrang hrang a sawi a. Pu Lalsiamthara, Manager, Apex Bank, Thenzawl chuan sum vawn dan leh peipun dan Financial literacy Campaign hun a hmang bawk a ni.

Chawhnu lamah CHC Thenzawl leh Integrated Ayush Hospital Thenzawl ten mipuite tan a thlawna inentirna hun health camp an buatsaih a.  SDO(C) Office bakah Apex Bank Thenzawl te pawhin Help Desk buatsaihin mipui ten awlsam taka an dawr nghal theih turin an inchhawpchhuak a ni.

He programme hi Thenzawl Civil Sub-Division chhunga mipuite hnen thleng phaka Department hrang hrang ten hna an thawh theih nan leh department awm chhan mipui ten an hriat theihna turin ruahman a ni a. Fehchhuah program hi tum dangah buatsaih chhunzawm zel a ni dawn a. Mipuite tan Common Platform siam thin tum niin, heng hunah hian department hrang hrang ten scheme awmsa leh programme an kalpui mek te zirtirna leh sawizauna hun an hmang thin dawn a ni. Fehchhuah Programme hi thlatin chawlhkar hnuhnung berah bial chhung khua/veng pakhat thlan bikah VC te nen kalpui thin tura ruahman a ni.

Vawiina Fehchhuah Programme bul tanna ah hian Thenzawla Department hrang hrang aiawhte an kal tha hle a ni.