Commerce and Industries changtu Parliamentary Secretary Pu Joseph Lalhimpuia chuan Pathianin Mizote talent tha tak min pek hi peipung zel tur leh eizawnna tlaka siam turin sawrkar scheme i chhawr tangkai ang u tiin vawiin khan Hnam Chhantu Autumn Exhibition 2016 chu Vanapa Hall-ah a hawng.

Pu Joseph Lalhimpuia chuan Commerce & Industries Department kaltlangin Mizote’n thiam thil, talent tha tak kan neihte peipunna tur remchang kawng tam tak a inhawng a, a chhawrtu tur mipuiten kan chhawr tangkai tawk lo, a ti. Parliamentary Secretary chuan sawrkar laipui atanga haichhuah theih scheme hrang hrang Commerce & Industries Department kaltlangin a hmuh theih a, heng scheme te hi department website-ah tarlan niin a then phei chu 100% grant-in-aid hmuh theihna a ni, a ti a. Heng te chhawr tangkaiin mahni intunna tur eizawnna tha tak kan siam thei a ni, a ti. Hnam Chhantu Pawl hmalakna fakin, kut themthiamna eizawnna tlaka siam kawngah sulsutu an ni a, an ni ang bawk hian midangte pawhin kan ti ve thei tih hre thar turin Pu Joseph Lalhimpuia chuan mipuite a chah nghal bawk a ni.

Hnam Chhantu Pawl-te’n Internet kaltlanga sumdawnna “hnamchhantu.com” an siam chu Parliamentary Secretary Pu Joseph Lalhimpuia hian a hawng nghal a. He website ah hian India ram hmun hrang hrang atangin Hnam Chhantu Pawl te thil siam chhuah a lei theih a ni.

Hnam Chhantu Autumn Exhibition 2016 hi October ni 3 atanga tanin October ni 5 thleng neih a ni dawn a. Thing leh mau atanga thil siam chhuah - thutthleng, bawm, plate, bowl, tar mawi chi hrang hrang bakah puan, kawr leh Mizo kutchhuak thildangte an zuar a ni.