Vawiin chawhma dar 11 khan District Industries Centre Complex Serchhipah an Department hnuaia NLUP trade hrang hrang thlangtute tan NLUP 3rd & 4th Phase tanpuina sem a ni a, Pi Vanlalawmpuii Chawngthu, MLA Hrangturzo bialtu MLA chuan khuallian niin a hmanpui.

Pi Vanlalawmpuii Chawngthu chuan, NLUP tanpuina dawngtute chu mi vannei tak an ni, a bik takin vawiina tanpuina dawngtute chuan naktuk mai atang hian sum an hai lut nghal thei mai dawn a, an vannei tak zet a ni a ti. NLUP trade hrang hrang ah hian a zai vai chuan a hlawhtlin vek theih bik loh mahna, mahse sawrkar lam chuan an tih tur tiin tanpuina an pe a, a hlawhtlinna atana lo beih ve chu a dawngtute mawhphurhna a ni si a ni, a ti. Tanpuina an dawn ang angte a nih dan tur taka hmanga hlawhtlina chang ngei turin duhsakna a hlan a, an hlawhtlinna chu tanpuina petu sawrkar laka lawmthu an sawina a ni, a ti bawk.

Vawiinah hian Serchhip District huam chhung khaw hrang hranga chhungkaw 182 te hnenah NLUP 3rd & 4th Phase tanpuina hi Rs. 90,16,500 (Nuai sawmkua singkhat sangruk zanga)pek chhuah an ni a, mi 18 te hnenah puanthui khawl Rs. 10,26,000 (Nuai sawm singhnih sangruk) man hu hlan nghal a ni bawk.

NLUP semna inkhawm hi Pi Elizabeth Lalremthangi Hmar, Functional Manager, DIC Serchhip chuan kaihruaiin sawrkarin ni khat thil thua cheng nuai tam tak mipuite hnena tanpuina atana a sem chhuak thei chu ropui a tih thu sawiin, a dawngtute pawhin a hmanna tur taka an hman ngei a beisei thu a sawi. Tin, tanpuina dawngtute chuan tha takin an hmang ngei em tih an enfiah zui leh vek tur thu a tarlang bawk.

Tanpuina sum sem zawh hnu hian Puanthui khawl dawngtute hnenah an khawl hman dan tur zirtirna hun mithiamten an nei nghal a ni.