4747/2025-2026

Kolasib, the 9th March, 2026: Vawiin chawhma dar 11:00 khan NABARD Kolasib District bultumin PMKSY Hall, Thingdawlah International Women's Day hman a ni a. He hun hi Thingdawl RD Block BDO, Dr. Doris Lalrinawmi chuan Khuallian niin a hmanpui.

Kumin International Women's Day pual hian United Nations (UN) chuan thupuiah "Give to Gain" tih a thlang a. Vawiin hun hmanna hi Pu J.D. Traite, DDM NABARD, Kolasib chuan kaihruaiin, hmeichhiate tana NABARD hmalaknate leh sawrkar laipuiin hmeichhiate hamthatna tura a duan scheme hrang hrang – Lakhpati Didis leh Namo Drone Didi Scheme bakah hamthatna awm thei hrang hrangte tarlan leh sawifiah a ni.

Khuallian Dr. Doris Lalrinawmi chuan thu sawiin, khawvel puma hmeichhiaten ni bik kan nei hran hi hmeichhiate pawimawhna lantirtu a ni, a ti a. Sawrkarin hmeichhiate hamthatna tur hrang hrang a siam thu sawiin, a bik takin Mizo hmeichhiate chu thenawm ramte nena khaikhinin dinhmun tha taka ding kan nih avangin, kan dinhmun thatnate hi a tha zawnga hmang thiam theuh turin kalkhawmte a chah a ni.

Hmeichhiate chu chhungkuaa fate enkawltu leh thuchhia-tha hrilh thei bertu an nih thu sawiin, Khuallian chuan, "Kan thawhthat chuan chhungkua mai bakah khawtlang leh ram thlengin a nghawng thei a ni," a ti a. Hmeichhiate chu tawngkam hmanah fimkhur a ngaih thu leh chapo anga lan a awl theih avangin, mahni pawimawhzia hriaa mahni nun theuhah fimkhur turin a chah bawk.

He hunah hian Pi Z.D. Lalramdintluangi, Block Mission Manager (BMM) pawhin thu sawiin, sawrkar atanga MzSRLM, RSETI leh DDU-GKY hnuaia training awm thei apangte chu chhawr tangkai thiam turin mipui a fuih a. Pu Thuamzamung Tunglut, Lead District Manager (LDM) Kolasib leh Pu Lalnunpuia, Branch Manager, MRB Thingdawl Branch ten thu an sawi bawk a ni.

Vawiin International Women's Day pual hun hmannaah hian Thingdawl leh a chhehvel atangin Self Help Group (SHG) member-te leh hmeichhe loneitu (Women Farmers) thahnem tak an tel a. SHG member thenkhatten SHG atanga an hlawhtlinnate sawiin, lawmawm an tih thu an tarlang bawk a ni.