No.2067/2020-2020 

Lawngtlai, Nikir thla ni 16, 2020: Nimin June ni 15, 2020 kha Young Mizo Association (YMA) din cham 'YMA Day' vawi 85-na a ni a. Hemi pual hian Thingfal Branch YMA leh Tuichawng Group YMA chuan Lawngtlaia quarantine facility-a awm mekte ei in mamawh phuhruk nan Lawngtlai District Level Task Force (DLTF) kutah chawhmeh, thei leh pawisa fai an hlan.

Thingfal Branch YMA-in Lawngtlai DLTF hnena thilpek an hlan hi antam, maian, phuihnam, sapthei hnah, dhania, bahkhawr, zopurun leh thlai dang, a zavaia ip 18 khat leh theihai leh balhla bakah, buhfai ip 4 (kg 150) leh pawisa fai Rs 20,000/- a ni a. Thilpek hi Thingfal VCP Pu Lalrammawia hovin Thingfal Branch YMA hruaitute'n Lawngtlaiah an hlan a, Lawngtlai DLTF ai awhin SDO (Sadar) Pu V. Lalruatliana'n lo dawngin, Branch YMA-in a tul anga an hman atan silpauline a lo hlan let bawk.

Tuichawng Group YMA hian account transfer-in Rs 3,000/- an chhung lut thung a ni.

Lawngtlaia quarantine facility-te ngai pawimawh a, YMA Day lawmna ni pah fawma thilpek hlantute chungah Lawngtlai DLTF chuan lawm thu a sawi a ni