No.2068/2020-2020
Veng tin leh khaw tina COVID-19 dova thawktu LLTF leh VLTF te chu information mike hmanga vengchhung mipuite thu hrilh leh social media-a thu an puanzar kawngah mi rilru tina lo turin ngen an ni.
State pawn atanga Mizoram mi leh sa lo haw, khunghran (quarantine)-te bakah COVID-19 natna vei ni a rinhlelh te chu swab sample la in RT-PCR test beihpui thlak mek a ni a. Hun reilote chhungin Mizoramah COVID-19 vei engemawzat hmuhchhuah a ni ta. He thil duhawmlo thleng mekah hian he natna veitute leh an chhungte rilru tur dawn hauh lova khua leh veng thenkhata information mike kaltlanga thupuan te leh social media-a thu thehdarh dengkhawng tak tak a awm tih hriat a ni a. He hun harsa takah hian sawrkar hnathawk tam tak COVID-19 kai theihna hmun hlauhawm tak takah ram tana an mawhphurhna hlenchhuakin an awm mek a. Chung zing ami, sawrkar hnathawk pakhatin he natna hi vanduaithlak takin a lo vei ta hial a ni.
Hei hi hre rengin Mizoram Sawrkar Disaster Managment and Rehabilitation Secretary Pi Lalbiaksangi chuan June ni 15, 2020 khan Mizoram puma Deputy Commissioner (DC)-te hnenah lehkha thawnin veng leh khaw tina Local/Village Council, tlawmngai pawl leh LLTF/VLTF te chu zirtir leh hrilhfiah a, COVID-19 darh zel lohna tura tan an lakna kawngah te, mipui inveng fimkhur tura information mike kaltlanga thu an puan thinah leh social media kaltlanga thuchhuah an siamah COVID-19 natna veitute rilru leh thinlung ti na lo turin a ngen a ni.
