No.2069/2020-2020 

Covid 19 hrileng avangin ramin hun harsa leh khirh tawk mekin mitinin mahni theihna ang angin do hna an kalpui mek a, Medical lam training chhuak thenkhatte phei chuan hlawh engmah phut lovin an thiamna te chu a tulna hmun apianga hmanga midangte chhanchhuak turin an inpe a ni. Lunglei District-ah pawh volunteer awm belh zelin a hnuaia tarlan te hi Lunglei District H&FW Department hotute hnenah Covid-19 do kawnga tul ang ang thawk tura inhuamin an rawn in report leh a ni:

1.     Laldinpuii 22 yrs. D/O Pu.Zoramchanthanga, Kikawn, Bazar Veng Lunglei . Diploma in Medical Laboratory Technology a train chhuak a ni.

2.     F Remruatsanga 21 yrs. S/O Pu.Lalchangliana, Theiriat, Lunglei. Auxiliary Nurse midwifery (ANM) zir chhuak tawh a ni.

3.     PC.Lalramhmahruaia 22 yrs. S/O Pu.PC Lalmuansanga, Ramthar Veng, Lunglei. Diploma in Medical Laboratory Technology a train chhuak a ni.

4.      C Lalthanpuii D/O Dr. CT Lalruatthanga, Chawnpui Veng, Tlabung. kum 2018 khan General Nursing and Midwifery (GNM) a zirchhuak a, state páwn hmun ṭhenkhatah pawh hun eng emaw chen a lo thawk tawh a ni.

Covid-19 avanga harsatna tawh mek karah heng volunteer-ten hlawh pawh phut miah lova midang tanpui tura an rawn inpe chu Lunglei District Task Force on Covid-19 chuan lawmawm tiin anmahni leh an chhungte chungah lawmthu an sawi a. An thiamna te chhawr tangkai turin Lunglei District H&FW Department te chuan hma an la nghal a ni.

Tin, Lunglei khaw pawn lam District chhung khaw thenkhat atangin volunteer duh mi engemawzat awm mek bawkin heng mite an volunteer chhunga Lungleia an awmna tur Lunglei District Task Force  chuan a ngaihtuah sak mek a. Hemi atan hian Department thenkhat building awm remchang te hman a ni ang .