No.2070/2020-2020  

Tukin Dt.16.06.2020 zing dar 8:00AM khan Directorate of Agriculture Office kawt atangin Agriculture Minister Pu C. Lalrinsanga chuan buh leh bala intodelhna tura hmalakna zinga pakhat leh tam zawk thar chhuahna turin Sub-Mission on Agricultural Mechanization (SMAM) 2019-20 hnuaiah lei lehna Tractor 50 sem chhuah tur atangin Custom Hiring Centre dinna hrang hrangah Tractor 18 vailiamna hun a hmang.

He hunah hian Minister chuan thu sawiin Covid-19 leng karah intodelh tur leh intodelh thei nih inhre rana  hnampui zia lo langa, hmasawn tura chhungkaw tin an phe ta suau suau chu ropui a tiin hei ngei hi hnam leh sakhaw humhalhna kipui ber a ni, tiin kal khawm te a hrilh a. Hnam zahawmna leh  Chanchintha hrilh te hi thu benglut ni tur chuan chhungkawtin fairelbel chhunkhah a ngaih rualin, thar chhuah ni lo mikhual chamrei Dal, Alu, Purun, Tomato leh Tel bakah Mizoram-in a deh chhuah ve theih tho si ram dang atanga chawkluh bungrua, thlai leh ran thlengin taimakna hmanga hnawt chhuak turin kal khawm te leh ram mipuite a sawm a ni.

Minister chuan SMAM hnuaiah kumin chhung hian Agriculture Department hian  Trailer, Rotavator leh Paddy Reaper telin Tractor 50 (sawmnga), Power Tiller lian 75 (sawmsarih panga) leh Mini Power Tiller 75 (sawmsarih panga) sem chhuah an tum a ni, tiin a sawi a.

Minister hian a thawhkhat nana leilehna tractor a vailiam te hi- Tuipui Zau, Tlangsam; Chhimluang WRC Farming Society, Kawlkulh; Farming Co-operative Society, Ruantlang; Dingdihlipa Sih Zau, Chawngtlai; Zopuite, Champhai te an ni.

Minister hi Pu H. Biakzaua, Vice Chairman, Agriculture Development Board, Pu Lalhmingthanga, IAS, Commissioner & Secretary, Agriculture Department, Pu Rohmingthanga Colney, Director, Agriculture Department leh midang ten an tawiawm a ni. .