State Level Committee on Green Mizoram huaihawtin vawiin chawhma dar 10 khan A.R.Ground ah Thingphun Beihpui (Ceremonial Tree Planting Programme) hman a ni a, State Level Committee Chairman Pu Lal Thanhawla'n a hmanpui.

Khuallian Chief Minister Pu Lal Thanhawla chuan sawmna ngaipawimawha lo kal te hnenah lawmthu a sawi a, ramngaw, thing leh mau, nungcha te humhalh leh boruak sik leh sa chhe zel siam tha tura hmalak chu sorkarin a ngaihpawimawh avanga thingphun beihpui programme chu ruahman a nih thu a sawifiah a, kum 11 kalta chhunga sorkar hriatpuia Mizoram puma thing tiak 16,50,855 phun a nih tawh thu tarlangin a enkawl zui lamah uar lehzuala tan lak a pawimawh zia hriaa tan la thar theuh turin kalkhawmte chu a chah. Mizoram puma ngaw chhah tha kan neih mek chu zaa pakhat (1%) pawh a tling tawh lo tiin thing leh mau te kan enkawl that loh hian kan ram leilung, boruak sik leh sa leh eizawnna thlengin nasa takin a tichhe mek reng a, hemi do let tura tan kan lak thuai loh chuan nakin lawkah kan ram hi thlaler chenna tlak lohvah kan la siam mai dawn a ni, a ti. Pu Lal Thanhawla chuan Environment & Forests Department lehkhabu buatsaih 'Bamboos of Mizoram' chu a tlangzarh nghal a, Mizorama mau chanchin chipchiar zawka ziahna a ni tiin Mizoram chu India ram puma mau nei tha ber kan nih thu leh mau hmanga kan sum leh pai (economy) siam tha tura mithiam ten an beih mek thu te a tarlang bawk. Chief Minister chuan tukin chawhmaa Indian Oil Company (IOC) hotute nen an inkawmna sawi langin Mualkhanga Gas Bottling Plant tihlen dan turte, Sairang rail station awm hun atana godown lian zawk an mamawh tur ruahman dan tur te, thlawhna tumhmuna petrol tha chi dah khawlna tur chungchang te, Khawzawl leh Thenzawl-a Petrol Retail Outlet siam chungchang an sawidun thute a tarlang bawk.

Programme kaihruaitu State Level Committee Vice Chairman Pu H.Rohluna, Environment & Forests Minister chuan Thingphun Beihpui chu Mizoram puma District tinah hman a nih thu sawiin Programme ruahman tu Sub-Committee on Green Mizoram te chungah lawmthu a sawi a. Mizoram ramngaw leh hnim hringin a khuh chin ram chu State zau zawnga 91.27 % (19240 sq.km.) a nih laiin ngaw dur tha chu 0.64 % (134 sq.km.) chauh a tlin thu a tarlang a, kan tu leh fate tana kan hnutchhiah theih chu boruak tha a nih thu te, thing phun chu midangte tana rawngbawlna tha tak a nih thu te a sawifiah a, kan ramngaw, thing leh mau leh nungcha te humhalh tlat tura intiam thar theuh turin mipui te chu a sawm a ni.

PCCF & Member Secretary Dr S.S.Garbyal chuan mihring nunna chu thing leh ramngaw ah a innghat tlat a ni tiin kum tina ramngaw a tlakhniam zel avanga kan boruak, sik leh sa, ruahtui leh lui te a chhiat zel hre renga tan la thar theuh turin kalkhawmte a sawm a, vawiin thingphun beihpui hunah hian lammual chhehvelah thing tiak 5000 phun a nih tur thu a sawi lang bawk. Ramngaw humhalh leh thing phun kawnga sorkar hmalakna tawiawma thawktu tlawmngai pawl, Village Council leh NSS Unit hrang hrangte chungah lawmthu a sawi bawk. Sub-Committee on Green Mizoram Chairman Pu Lal Thanzara, Parliamentary Secretary chuan lawmthu sawina hun a hmang bawk.

Thingphun Beihpui Programme ah hian kum kalta chhunga ramkang venna kawnga hma la tha te hnenah lawmman Khuallian hian  a sem a, District thawk tha ber chu Lawngtlai niin tangkafai Rs.20,000 /- leh Certificate hlan an ni a, District tina hma la tha khaw 3 theuhte hnenah lawmman hlan an ni bawk. Chanchinbu lama ziak tha : Pakhatna - Zoram Thlirtu, Pahnihna - The Aizawl Post leh Pathumna - Chhawrpial te hnenah lawmman hlan an ni bawk a ni.
    
Programme hman zawh hian lammual thlang lamah thing phun nghal a ni a, Thingphun Beihpui neihna ah hian Land Revenue & Settlement Minister Pu J.H.Rothuama, Parliamentary Secretaries te, MLA te, Chief Secretary leh Officials thahnem tak bakah Assam Rifles hotute leh college leh school zirlaite National Service Scheme (NSS) member te an kal a ni. Vawiin thingphun beihpui ah hian sorkar department hrang hrang ten Melthum-Falkawn inkarah thing phun hna an thawk theuh bawk a ni.