“Thingphun uar la, Venghim rawh” tih thupui hmangin State Level Committee on Green Mizoram chuan Green Mizoram Day lawmna tukin zing dar 7:30 khan Central Agriculture University Auditorium, Selesih ah an nei.

He programme ah hian Pu Lalrinmawia Ralte, Environment & Forest Minister leh State Level Committee on Green Mizoram Co-Chairman nibawk chu khuallian niin a hmanpui, kalkhawm hmaah hawnna thu sawiin, Mizoram nuam leh hrisel siam turin mitinin thing leh mau humhalh hi kan mawhphurhna a ni tih a sawi.”Nungcha leh thingte hi kan ngaina lo anih pawhin, thangthar zel te hriselna leh nuam taka an awm theih nan i humhalh ang u” a ti bawk.

Pu Lalram Thanga, IFS, Principal Secretary/Principal Chief Conservator of Forest, he inkhawm kaihruaitu chuan thingphun leh venhim chu mitin mawhphurhna a nih thu sawiin, thing chu kan lei (earth) tana chuap (lungs) a ni a, chuvangin mihring ten boruak tha kan neih theih nan thingphun uar a venhim a tul a ni tih a sawi. Green Mizoram denchhen a thingphun ah hian thing tiak 2,60,000 aia tam phun anih tawh thu a sawi a. Heng te hi nung vek lo mahse a hlawkna tam tak kan hmu a ni a ti. Tun tum ah hian thingphun naran ni lovin a nung ngei tur ang chi phun a nih tur thu a sawi bawk.

Pu Lalthangliana Murray, IFS, Chief Conservator of Forest pawhin Green Mizoram hman thin a nih dan chungchang sawiin, he programme hi 100 % in hlawhtling lo mahse, India ramah thingphun avangin boruak tha khawl tha ber State 2-na kan hauh theih phah thu a sawi.

He programme ah hian Fire Prevention (Kang mei ven) kawng a thawk tha district leh Aizawl District a khaw tithate hnenah lawmman khuallian hian a sem a. Mizoram District a titha ber chu Mamit District niin Aizawl District in a dawt a, pathumna ah hian 2 awmin Saiha District leh Lawngtlai District an ni. Aizawl District khaw tithate chu 1-na Phullen khua, 2-na Thanglailung khua leh 3-na Sihphir Vengthar te an ni. Lawmman hi 1-na in Rs. 50,000/-, 2-na in Rs. 30,000/- leh 3-na in Rs. 20,000/- an dawng.

He programme tawi fel takah hian Ramhlun North Zaipawl leh zaithiam dangten, Pathian thilsiam kan humhalh hi mitin mawhphurhna anih thu hla in an puang chhuak a, Pu Lal Thanzara, Minister of Health & Family Welfare etc., Pu Joseph Lalhimpuia, Parliamentary Secretary leh sorkar mi pawimawh, MJA NGO, leh zirlaite an kal tha hle a ni.