Vawiin khan Helen Lowry Higher Secondary School NSS Unit & Medical Lab. Technical Department chuan Thingsul Tlangnuam ah Free Medical Camp an buatsaih. He Medical Camp hawnna inkhawm, Thingsul Tlangnuam Community Hall-a neihah hian he khua Model Village a thlangtu Tawi bialtu MLA, Home Minister Pu R. Lalzirliana chuan hmanpuiin, NSS Unit-te chu sawm hmasak pawh nilova thahnem ngai takin tlawmngaia an rawn thawkchhuak chu lawmawm a tih thu a sawi a ni. He hunah hian Dr. Lalzuiliana, State NSS Officer-cum-Deputy Secretary, NSS Cell, Sport & Youth Services Department chu khualzahawm a ni.

Minister Pu. R. Lalzirliana chuan ram tihhmasawn nan ruahmanna tha tak tak duang mah ila a chhunga cheng mihringte kan hrisel loh chuan a thlawn mai a ni, tiin hriselna tha neih pawimawhzia a sawi a. India rama Cancer vei tamna ber state kan ni mauh mai pawh hi thil zahthlak tak niin, kan nunphung siamthat a, ei leh in, zuk leh hmuam kan hman danah te kan fimkhur a tul tak meuh a ni, a ti a. Ram dang atanga ei theih kan lakluh, quality control lam enfiahna paltlang lo te kan eiin kan in thin hian kan fimkhur lohzia a tilang a ni, a ti.

Minister chuan hrisel tur chuan mahni invawn thianghlim a tul ani a ti a. Hri chhia, HIV/ AIDS kan ramah a pun chhoh zel thu tarlangin, ram dangah pawh a awm ve tho, amaherawhchu invenna lamah an thangharh hle a. Mizoramah pawh heng hri thalo inkaichhawntheih lakah hian a vei mekte thinhrikna tel lovin, a la vei ve loten kan inven thiam a pawimawh hle a, a bik takin mipat hmeichhiatna kawngah insumtheih a ngai a ni, a ti bawk.

Home Minister hian Thingsul Tlangnuam chu Model Village a nih angin vawiina programme neihna Community Hall chu sak pum a nih theih nan tanpuina cheng nuai 4 pek a tiam a ni.

Vawiin Medical Camp hawnna inkhawm hi Pi Thangzovi Fanai, Helen Lowry HSS Principal chuan kaihruaiin, Thingsul VCP leh Vice-President, Thingsul Tlangnuam Branch YMA Vice-President leh Doctor-te aiawh atangin thusawi ngaihthlak a ni a.

Adventist Hospital atanga Doctor panga (Paediatrician 1, Dental Surgeon 2, Gynaecologist 1 leh General 1) leh nurse ten nilengin damlo an en a. Anni hi Helen Lowry NSS Unit zirlai 30 vel leh Staff engemawzatin an pui a. Damlo te hi a thlawnin damdawi pek an ni bawk.