Health Minister Pu Lal Thanzara chuan vawiin khan a pisaah Reduction of Infant Mortality Rate (IMR) incentive atanga lei Ambulance pahnih chu Health & Medical Education Director Dr. K.Lalbiakzuala hnenah a hlan.

Mizoram sawrkar Health Department chuan IMR tihniam tura hna a thawhthat avangin 13th Finance Commission atangin incentive grant an lo dawng tawh a. Nikum June 16-a Chief Secretary kaihhruaina hnuaia High Level Monitoring Committee thukhawm chuan he an sum atang hian ambulance lei nan cheng nuai 55 a pawm sak a. Tunah hian Bolero Ambulance pahnih lei a ni. Medium Vehicle Ambulance pahnih dang pawh lei tura hma lak mek niin a pakhat zawk chu ICU on Wheels a hman tur a ni a. ICU on Wheels hi khawl tha leh changkang tak tak, damlo nunna chhan nana mamawh transport ventilator, multi monitor, infusion pump, laryngoscope leh a dangte a thuam tur a ni. ICU on Wheels hi neih thuai tum niin a buaipui turin Guwahati lamah mi pawimawhte an thang mek a ni.

Pu Lal Thanzara chuan ambulance hi damlo enkawlnaah a lova awm theihloh a nih avangin lei hmasak ang ang te damlo ten tangkai taka an hman nghal theih nan inhlanna hi a rang lama buatsaih a ni, a ti a. Ambulance lei hmasak pahnihte hi Light Vehicle an nih angin khawpui chhung leh hmun dangah pawh an tlang zung zung thei dawn a, damlote tan tangkai taka hman a nih ngei a beiseiawm hle, Health Minister chuan a ti bawk.

Ambulance inhlanna programme ah hian Health Services Director Dr Rohmingthanga Ralte leh Health Department officer engemawzat an tel.