Nimin khan Thingsul Tlangnuam chu Indian Society on Tobacco & Health (Mizoram Chapter) President Pi Lal Riliani’n ‘Tobacco Free Village’-ah a puang a. Hemi puala Thingsul Tlangnuam Presbyterian Kohhran Hall-a inkhawm buatsaihah hian Health Secretary Pi Esther Lal Ruatkimi leh Health Department mipawimawh engemawzat bakah Thingsul Tlangnuam khaw mipui thahnem tak an tel a ni.

Pi Lal Riliani chuan nunna tam tak pawt tawi tu, hriselna ti chhetu vaihlo leh a kaihhnawih do hi ram leh hnam hmangaihtu te tan chuan tih-mak-mawh, mawhphurhna kan kova innghat a ni, a ti. Vaihlo leh a kaihhnawih hmangtute zirchianna Global Adult Tobacco Survey report-in a tarlan danin Mizoram-ah mipui za zela 67 te hian vaihlo leh a kaihhnawih thil chi hrang hrang ei, hmuam leh zu an awm a, Mizoram sorkar-a Economics & Statistics Deptt. pawhin Mizo zingah vaihlo leh a kaihhnawihin a thlen natna avanga thi kan tam ber tih a hmu chhuak a ni, a ti. Kum 23 kal ta a Indian Society on Tobacco & Health (Mizoram Chapter) a lo din atang khan theihtawp chhuaha zuk leh hmuam that lohzia zirtirna leh sim tura mite fuihna an lo kal pui tawh thin thu sawiin Pi Lal Riliani chuan Thingsul Tlangnuam-in vaihlo leh a kaihhnawih tih rem tuma  an hmalakna a fak a. Khaw dangte entawn tlak khawp a tha leh hlawhtling a hmasawn zel tura duhsakna hlan chungin Thingsul Tlangnuam khua chu “Tobacco Free Village” ah a puang a ni.

Health Secretary Pi Esther Lal Ruatkimi chuan zuk leh hmuam thatloh zia hriaa ram pum huapa a do hna beihpui thlak a nih thu te, sorkar-in vaihlo leh a kaihhnawih khuahkhirhna leh khapn dana COTPA hial a siam thu a sawi a. Ram pum huapa  ber kaina tlem te kan neih zingah a chhe lam, vaihlo leh a kaihhnawih hmangtu tam ber kan ni hi a pawi a, thanharh a hun ta takzet a ni tiin he mi kawnga a sul sutu ni tura Thingsul Tlangnuamin tan an la chu an fakawm tak zet a ni, a ti.  

Inkhawmah hian Mizoram State Tobacco Control Society Nodal Officer Dr Jane R Ralte chuan Mizorama vaihhlo khuahkhirhna chungchang leh COTPA dan kenkawh anih dan te, a bawhchhia te tana hrem theihna dan chung chang a sawi a. Indian Society on Tobacco & Health (Mizoram Chapter) Vice President Pu VL Bela pawhin thu a sawi a ni.

Thingsul Tlangnuam khua hian kum 2012 kum lai hawl vel atang khan Tobacco Free Village ni thei tura hmalakna an kalpui tan a. Thahnemngai leh inlungrual taka an hmalakna chu Indian Society on Tobacco and Health (Mizoram Chapter) chuan hma lak chhoh puiin Mizoram State Tobacco Control Society (MSTCS) pawh in a tul ang angin hma a lakpui bawk a ni. Kohhran hrang hrang, tlawmngai pawl hrang hrangte leh Village Council atanga khawtlang aiawh kal khawmte chuan Anti-Tobacco dinin member te chuan area hrang hrang chan an insem a, chhungkaw tin hnenah campaign beihpui an thlak thin a ni. Thingsul Tlangnuam khua in Vaihlo leh a kaihhnawih thilte an hman dan Survey chu March 2013 chhung khan neih a ni a. Hemi atan hian MSTCS chuan Survey Format te siam in, Thingsul Tlangnuam, Anti-Tobacco Committee te chuan an khaw mipui kum 13 chin chunglam zawng zawngte hnenah survey hi an nei ta a ni. 

He Survey atanga a lan dan in Thingsul Tlangnuam khua ah hian in 257 a awm a, kum 13 chin chunglam hi mi 923 an awm bawk a ni. Heng kum 13 chunglam zingah hian Vaihlo, a zuk emaw a hmuam chi hmang mi 655 (70.96%) an awm a. Meizu thin mi 312 (33.8%), Sahdah hmuam thin 362 (39.2%), Tuibur hmuam mi 74 (8%), Vaihlo a zuk chi leh hmuam chi hmang kawp mi 59 (6.4%) an awm a ni. Hemi bakah Kuhva ei thin hi 509 (55.14%) an awm bawk a ni.