Thingsulthliah Community Health Centre kum 60 tlinna Diamond Jubilee chu nimin 23rd September, 2015 khan Thingsulthliah CHC Complex ah neih a ni a, Pu R. Lalzirliana Home Minister, bialtu MLA ni bawk leh Dr. K. Ropari, Principal Director, Health & Family Department ten an hmanpui.
Pu R. Lalzirliana chuan thangkhat lian zet helai hmun chenchilha a bial anihna ah mipui, NGO hrang hrang leh sorkar hnathawkte khawtlang hmasawnna tura lungrual leh inngeih taka an thawhho thinna ah lawmthu a sawi a. Sorkar hnathawk te hek fo thintu khua nih te hi a tha ber lo va, kawng thenkhatah fellohna an nei anih pawhin thawhpui dan thiam zawk tur in a fuih.Kantaksa tana tha lo tur ei leh in ah te, ruihtheih thil chi hrang hrang ah te insum in, dam leh hrisela damlai ni hmang thei tura fimkhur leh insumtheih a pawimawh thu a sawi bawk a ni.
Dam leh hrisel hi a hlu in mitin in kan duh, damdawi In leh a kaihhnawih a thawktu te chetzia leh tawngkam a pawimawhin a hlu hle a ni tiin Minister chuan damlo te leh anmahni mamawhtu te tan an tawngkam tha leh mawi, khawngaihna mitmeng chu damna a tling tih sawiin Kristian kan nih chuan mi mangang leh damlo te tanpui hi kan tih tur a ni a, auh phakah awm tur a ni a ti bawk. Mihring te hi chapo awlsam tak, sawisel erawh chu haw thei viau si kan nih thin avangin mahni inen chian a pawimawh a, chutih laiin ram leh hnam, khawtlang tana thil tha tur ah chuan bawhzui zel mai tur, sawisel hlauh a vanga thil tha pawh umzui ngam loh nih chu a pawi zawk thu a sawi. Khuallian chuanAyushBuildingsak tum anih thu leh Ayush damdawiin bik hawn thuai tum anih thu leh a sakna hmun turte pawh enfel anih tawh a sawi bawk.
Thingsulthliah CHC Diamond Jubilee lawmna hi Dr. C. Lalhmingmawii, Medical Officer in a kaihhruai a. Dr. C. Lalzepuiin in lawmna thu a sawi. Khual zahawm Dr. K. Ropari pawhin thu sawiin Health Department chu mipui ta a ni a, Nau neihna bik atan phei chuan Ambulance koh man pawh a awm loh thu leh mipui te hriselna atana sorkar in hma a lak dan hrang hrang a sawi a ni.
