Kum 2017-18 chhung khan NABARD (National Bank for Agriculture and Rural Development) chuan Mizoram sawrkar hnenah thingtlang hmasawnna tur Rs 245.00 crore a pe a. Hei hi kum dang zawng aiin a sang zawk kum a ni. NABARD sum hmang hian project hrang hrang kalpui a ni a. Lei dawh te, tui lakna tur siam te, ran enkawlna damdawi in, ran zawrhna hmunpui siam te, thlai thar zawrhna tur siam te, kawng (111km) siam te, rubber chinna tur siam te, Horticulture Department hmalakna a tan warehouse siam te a tel a ni. Project hrang hrang atang hian ni (day) nuai 31 inhlawhna tur a awm a, mi 20000 velin tui in tur thianghlim an neih phah ang a, kut hnathawktute tan ram hectare 159-ah tui lak luh a ni ang a, thlai thar dah thatna leh hralhna changtlung tak siam a ni ang. 

Bank hnena sum puktir :

NABARD chuan Mizoram Rural Bank leh MCAB hnenah thlai thar chhuahna atan te, vawk leh ar vulhna leh in sakna tur ten sum a puktir a. A vawikhatna atan commercial bank ho hnenah pawh a puk tir a ni. 

Kut hnathawktu leh puantahtute puihna :

Kuthnathawktute chawi kanna turin kum 2017-18 chhung khan NABARD chuan Tribal Development Fund hnuaiah project pakhat East Lungdar Block, Serchhip district-ah a sanction a. He project hian khua 4 atangin chhungkua 250 a tuam dawn a. Puantah lama eizawngtute chawikan nan hmalak tum a ni. 

Thlai thar hralhna hmun :

Thlai thar leh thil dang zawrhna turin Rural Haat (Champhai, Mamit) leh Rural Mart (Champhai leh Lunglei)-ah te siam tum a ni. 

Farm lama thar hlawk zawkna tur project thar :

Kut hnathawktuten tarn zawk leh hlawk zawka an thar theihna turin NABARD chuan project thar leh dangdai enchhinna turin ICAR leh Mizoram University nena tangkawpin project 4 a sanction a. 

Chungte chu: 

i) Tui khawlna tlawm siam

ii) Vaimim leh buh chi tharchhuah atanga kut hnathawktute sum lakluh tih tam

iii) Vawk vulh leh sangha khawi kawp

iv) Green terracing 

Mizoram tana tuihna humhalh :

NABARD chuan tuihna humhalh turin springshed project pathum a sanction a. Chungte chu Lungtianzau (Aibawk), Bawngthah (Khawhnuai-Tuikhurzau) leh Chhuanthar Tlangnuam, Serchhip District-ah te an ni. 

Cooperative tih changtlun :

Kuthnathawktuten tangkai zawk a an chhawr theihna turin Mizoram Cooperative Apex Bank kaltlangin Primary Agriculture Cooperative Societies 26 hnenah tanpuina pek a ni a. Heng society hian hma pawh an sawn phah hle a, deposit an hmu tha a, loan pawh an sem chhuak tha hle. Tin, PACS panga hnenah Office bungrua pek an ni bawk. 

Potential Linked Credit Plans

NABARD chuan District 8 tan Potential Linked Credit Plan a buatsaih a, State Focus Paper 2018-19 pawh tih chhuah a ni. 

NABARD chuan Mizoram state hmasawnna kawng a hma latu state sawrkar, bank te leh a thawhpui dang zawng zawngte hnenah lawmthu a sawi a ni.