NABARD Regional Centre Office, Aizawl chuan January 25 khan Mizoram chhunga thingtlang tih hmasawnna tur Rural Infrastructure Development Fund pek chhuah dan tur rel felin heng sum te hi Mizoram sorkar-ah pek chhuah a rem ti a ni.

NABARD in sum a pek chhuah tak te chu : Aizawl-a ran talhna in atana Dry Rendering Plant leh Lairage siamna tur a pum puia sen tur  cheng nuai 295.28 atangin cheng nuai 250.71 chu loan angin a pe chhuak a. A bak cheng nuai 44.57 chu state sorkar tum ve tur a ni. A hna hi AH & Vety Department thawh tur niin March 31, 2011 ral hmaa peih tura beisei a ni. Cheng nuai 1146.21 senna tur New Capital Complex, Phase II; Chhuarlung Water Supply Scheme, Champhai Water Supply Scheme chhunzawmna tur leh Khawlailung leh Saituala ruahtui dawn khawlna atan NABARD hian loan in cheng nuai 1031.24 pek chhuah a remti bawk a. A bak cheng nuai 114.97 chu state sorkar tum tur a ni thung. PHE thawh tur heng hna te hi 31 March 2011 ral hma a peih fel beisei an ni. Kawngpui siamna tur lamah pawh NABARD hian loan in sum cheng nuai 6190.28 pek chhuah a rem ti bawk a. He sum hi district 4 - Aizawl, Serchhip, Saiha leh Lunglei huamchhunga kawngpui 13 leh leilawn 2 siamna tur an ni. Heng hnathawhna tura sum sen zawng zawng tura bithliah chu cheng nuai 6878.09 niin NABARD in loan a a tum  bak  cheng nuai 687.81 chu state sorkar tum tur a ni a. Hna hi Mizoram PWD thawh tur niin kawng 182.45 Kms siam tur a ni a, peih fel a nih hunah chuan thingtlang khua 55 huamchhunga mipui 88,000 laiin an chhawr tangkai dawn a ni. Nakum sorkar kum ral hmain heng kawng leh leihlawn dawh hnate hi peih fel hman tura riruat an ni bawk.