Vawiin khan Government Lawngtlai College a Red Ribbon Club leh NSS ten Lawngtlai District Hospitalah thisen unit 35 an pe.

Vawiina Lawngtlai Hospital Blood Banka dah tur thisen pe tute hi an vaiin mi 35 an ni a, an zingah hian hmeichhia 12 lai an tel a, Blood bank-a thawkte leh AVBD Lawngtlai District hruaituten College ah kal chilhin thisen hi an la a ni.

Kum 2013 chhung khan Lawngtlai District Hospital-a thawktute leh AVBD Lawngtlai District tangkawpte hian thisen pek runpui tum 27 an huaihawt tawha, heng thisen pek runpui neihna atang hian thisen unit 555 zet blood bank hian a dawng a, heng zinga unit 89 hi hmeichhia te pek a ni.

Heng pawlhote pek bakah hian mimal thahnem ngai ten a khat tawkin an pe ve deuh reng tih sawiin Lawngtlai CMO Dr. HC Thangkima chuan a sawi a. Heng mi tlawmngaite thisen pek hmang hian Lawngtlai District chhunga Hospital dang Christian Hospital te, Lairam Christian Medical Centre te bakah Chawngte lama Civil Hospital te pawh an mamawh ang zela pek chhuah niin kan indaih hram hram zel rih a ni a ti bawk.