Mizoram Calendar-a tarlan thin August - Thitin Thla leh September - Mim Kut Thla chungchangah ngaihdan hrang hrang a awm thin thlirin hemi chungchang huamzau taka sawihona Symposium chu I&PR Department huaihawtin vawiin khan anmahni Conference hall-ah neih a ni.

Symposium-a tel tur tlawmngai pawl hrang hrang aiawh leh mimal sawm bik bakah hemi lam bengvar engemawzat kal khawm te chuan sawihona hun thawl tak an hman hnuin hmasang pipute serh leh sang hman thinah Mim Kut leh Thitin te chu inzawm tlat, hun hrana neih thin a nih loh dan te tarlan a ni a. August thla hunlai pawh hi mual hrang leh lal ram hrang hrangah te, Mizo hnahthlak hnam thenkhat te pawhin ‘THLAZING’ tia an lo vuah thin a nih dan te sawichhuah a ni bawk a. Sikul zirlaibu-ah pawh August leh September thla hming puttir chungchangah hian ngaihdan hrang a awm mek thu te pawh Symposium-a sawilan zingah a tel a ni.

Vawiina Symposium-ah chuan Mizo hming pua thla hming phuah thar theihna emaw hmanlai mek thlak danglam kawnga thuneihna an neih loh zia te pawh sawilan a ni a, amaherawhchu mipui nawlpui leh miril zawk ten an pawm theih tur thla hming puttir mai chu Mizoram Calendar buatsaihtu I&PR Department tih tur niin ngaihdan an siam a ni.

Symposium hi Dy. Director, I&PR Pu Lalsiama Fambawl-in  kaihruaiin I&PR Director Pu Jim K. Chozah chuan Symposium buatsaih chhan leh thukamkeuna hun a hmang a. Department-in kum tina Calendar a tihchhuah thin chu buatsaih tan a nih thu leh ngaihdan hrang hrang inkara thutlukna mumal tak Department-in a duh avanga hetiang inrawnkhawmna hun hi buatsaih a nih thu a sawi.