Vawiin khan Agriculture Director Dr. C. Lalzarliana chuan District Agriculture Officer-te Video Conference a neihpui a. Agriculture Joint Director pahnih Pu C. Lalniliana leh Pu Lalrinliana te chu Lunglei District, Serchhip District leh Champhai District-a thlai venhimna chungchang training an pek mek avangin he hun hi Serchhip leh Champhai atang pawhin video conferencing-in an hmanpui a ni.
        
He Video Conference-ah hian Mizoram puma Agriculture hmalakna hrang hrang DAO te leh Officer dangte nen uluk taka sawihoin  NLUP hnuaia – WRC-I, WRC-II, Oilpalm leh fu chin chungchanga loneitute hmalak dan leh Department-in a enzui pui dan te report-in an harsatna te an sawiho.

Kumin hi Buh thar tam kuma puan a nih angin buh thar tamna atana hmalakna pawimawh SRI hmanga buh chin dan leh hmalak dan te, Improved Package of Practices hmanga buh chin dan te leh tlangram loneitute dinhmun hrang hrang an sawiho bawk. Agriculture Department hian Zoram hmun tina buh chingtute hming leh an ram zau zawng uluk takin an chhinchhiah mek a, chumi atan chuan Farmer’s Identity Card pawh kumin Krismas hma ngeia peih fel hman an tum.

Kum 2011 chhunga Oilpalm tiak an sem tawh zat leh phun tawhna ram zau zawng te ngun takin an sawiho a, Company pathum ten oilpalm sawngbawlna hmun tur pawh tihfel tawh a nih thu report a ni.

Kumin hian buh eichhetu rannung hmun hrang hrangah hmuh a ni a, heng buh eichhetu rannungte beihletna kawnga Department-in hma nasa taka a lakna chu tangkai hlein an hria a, hetiang lama inzirtirna pawh ngawrh takin an kalpui mek a ni. Buh eichhetu rannung te hi kumina pung thar thut ni lovin hetiang lama inzirtirna tha a awm tak avangin hei hian hriat a hlawh ta mai niin an sawi bawk.

Report-a a landanin nikum aiin kumin hian buh thar tam ngei an inrin thu Lunglei District leh Lawngtlai District atangin dawn a ni.

Agriculture Department hian Video Conference hi vawi thum lai an lo nei tawh a, ni khat thilthua Zoram District hrang hrang tlawh chhuah theihna remchang tak a nih avangin hlawk thlak an ti hle. Ruahmanna tha tak lo neihpuitu NIC te chungah pawh lawmthu an sawi.