Mizoram Law College chuan vawiin chawhma dar 11.00 khan an college-ah kum 2011 academic session-a zirlai lut tharte lawmna inkhawm an buatsaih a; Law Minister Pu Lalsawta chuan a hmanpui.

Pu Lalsawta chuan, “Khawvel inlumlet ang zelin zirna kalhmang pawh a danglam chak a, eizawnna nena a inthlunzawm dan pawh tunhma nen a inthlakthleng nasa tawh hle a; chuvang chuan zirlaiten tum mumal tak nei a lehkha kan zir a hun tawh tak meuh a ni” a ti. Eizawnna leh hna mumal thawh tur neilo leh zawng mek mi sang tam tak an awm mek thu sawiin, “Tun hma chuan mithiam kan la tlem avangin lehkhazir chhuak tawh phawtte chuan anmahni phu tawk hna an hmu zel a; mihring indaih lohna avangin hna-in mithiam a zawng zawk emaw tih tur a ni a. Chutiang boruak chu a lo inthlakthleng tak avangin eizawnna tling zirna kan thlan thiam a pawimawh a; chutiang zingah chuan Dan zirna hian hmakhaw eng tak min siamsak thei a ni” Law Minister chuan a ti bawk. Pu Lalsawta chuan, “Dan leh Dan hmanga dik taka rorel hi thil thuhmun a ni lova; dik taka rorel leh a reltu tur kan neih theihna turin law zirlaite hian nasa lehzuala tan in lak a ngai a ni” tiin Mizoram Law College zirlaite a fuih a ni.

Mizoram Law College hi Aizawl Law College leh Liandingpuia Law College inchhunfinin, kum 2004 khan din a ni a; Aizawl Law College a lo tawp tak avangin October 2004 khan Mizoram Law College tia vuah a ni ta a ni. 25th August, 2006 khan deficit dinhmunah hlankai a ni a; Mizoram University hnuaiah inziak lutin, University Grants Commission-in a pawmpui bawk. Tunah hian Principal Dr. Rualkhuma Colney bakah Asst. Professor 5 an awm a; zirlai 227 an awm mek a, kuminah hian zirlai lut thar 125 an awm a ni. He college atang hian LLB zirzo mi 270 zet an awm tawh nghe nghe.

Mizoram Law College hi tunah Tuikual-ah mimal in luahin an awm a; tunah hian DoNER Ministry hnuai atanga cheng nuai 289.8 an hmuh atangin Luangmual-ah anmahni college building tur sak mek a ni a; UGC atanga cheng nuai 30 an dawn atangin Luangmual-ah vek hian Hmeichhe Hostel an sa mek bawk.

Vawiina Freshers’ Social hi Students’ Union vice-president Vinicia Z. Pachuau chuan a kaihruai a; chawhnu lamah intihhlimna hun an hmang chhunzawm a ni.