Vawiin chawhma dar 11 khan Women’s Polytechnic, Aizawl chuan an Multipurpose Hall-ah Fresher’s social an hmang a, Pu Chawngtinthanga, Parliamentary Secretary chu khuallian a ni.

Khuallian chuan thu sawiin, mihring puite tana thil tha tih hi Pathian tana ti kan nih hi hre nawn leh fo turin zirtirtute leh zirlai kalkhawmte chu a chah a, thiam tura zira, mahni bakah ram leh mipuite chhawr tlak a thiamna hmang tangkai thei khawp zir chhuak turin zirlaiate a fuih.

Zirtirtute pawh fuihin, Khuallian chuan khawvel thiamna sang leh changkang chho zelah inzir thar a, man pha thei turin tan la ang che u, a ti, a ni.

He zirna In Principal Er. K. Zodingliana pawhin thu sawiin, kuminah zirlai thar 97 lai an nei a, Lecturers 26 leh staff 16 an neih thu sawiin, an mamawh hrang hrang te khuallian hnenah sorkar a sawi sak turin ngenna a siam bawk.