Hmarchhak state huapa North East Games 2012 Mizorama nghah turah inbuatsaih tan a ni ta. Hemi chungchang ngaihtuah hian Sports Minister Pu Zodintluanga hovin sorkar mi pawimawh thenkhat te chu vawiin khan ama office chamber-ah Organising Committee an thukhawm a, hmalakna tur hrang hrang thlirin Sub-Committee 13 an din nghal a ni.

Committee kaihruaitu Sports Minister chuan hetiang inelna puitham Mizoramin a thlen turah hian uluk taka inbuatsaih a tul thu te, infiamna hmunhma cheibawlna remchang a nih tur thu te sawiin mawhphurtu hrang hrang te fuihna thu a sawi a ni.

Vawiin Committee-ah chuan he North East Games 2012-a lo tel tur infiammi zawng zawng te thlen nan Referral Hospital Quarters, Falkawn tinzawn ni se a ti a. Infiamna neihna hmun tur hrang hrang Athletics - Rajiv Gandhi Stadium & Rajiv Gandhi Stadium; Badminton - Govt. Mizo Higher Secondary School Indoor Stadium; Football - Aizawl Sipai Lammual & Rajiv Gandhi Stadium; Judo - Pitartetlang Indoor Stadium; Weightlifting - Pitartetlang Indoor Stadium; Table Tennis - Kulikawn Indoor Stadium; Boxing - Govt. Mizo High School Field;  Wrestling - Pitartetlang Indoor Stadium 2nd Floor; Volleyball - Aizawl Sipai Lammual; Taekwondo - Electric Veng Indoor Stadium leh Hockey - Republic Field & Ramhlun Sports Complex-ah te ruatchhin a ni.

North East Games 2012 hi nakkum February thlaah Mizoramin a thlen tur a ni.