Vawiin chawhma dar 10 khan Mizoram Legislative Assembly Speaker Pu R. Romawia’n 1^st Inter-College Arm Wresting Championship, 2011 a hawng.  He Championship hi Mizoram Arm Wrestling Association leh Aizawl City College Joint Student Union tangkawpin an buatsaih a ni.

He Championship hawnna ah hian Speaker Pu R. Romawia chuan College hrang hrang zirlaite leh championship buatsaihtute chibai bukin zirlaite tan infiamna leh inelna, sum tam tak sen ngailo ang chi buatsaih a ni chu lawmawm a tih thu a sawi a. Mizo thalai infiammiten beiseina eng kan neih vena chu mahni rihpui te nena inpawhchilh lam leh inelna chi te hi anih avangin rampum huap leh International Level thleng pawhin Arm Wrestling-ah hian Mizo thalaite tan beiseina sang tak a awm a ni a ti a.  Aizawl veng hrang hrangah hian hmun duh zau lemlo Volleyball leh Basketball court siam theih nan ngaihtuah zela that thu a sawi chhuak bawk.

Speaker chuan zirlai competition a tel tur zawng zawngte duhsakna hlanin kumin June thla a National Arm Wrestling Championship Ludhiana a neih tuma Medal dawngtu a hnuaia tarlante hnenah certificate a hlan nghal a ni. 1) Zirthantluangi Jr.  below 55kgs - Gold ; 2) Juliet Lalengkimi Sr. below 60 kgs - Silver ; 3) Laltlankimi Jr. below 50kgs - Silver ; 4) Judy Lalrinpuii, Jr. below 45 kgs - Bronze ; 5) Lalremchhungi, Sr. below 70 kgs - Bronze ; 6) Eden Ramtharnghaka, Jr. below 55 kgs - Bronze.